अमेरिकाका राष्ट्रिय सुरक्षा सल्लाहकार जेक सलिभानले चीनका शीर्ष कूटनीतिकर्मी वाङ यीसँग कुराकानी गरेको शुक्रवार ब्लूमबर्ग सञ्चारमाध्यमले खबर दिएको छ । 

संसारका दुई ठूला अर्थतन्त्रबीचको सम्बन्ध निकै चिसिएको बेलामा चीनसँग कुराकानी गर्न अमेरिका व्यग्र छ । 

ताइवानकी राष्ट्रपति त्साई इङ–वन अमेरिकाको बाटो हुँदै मध्य अमेरिका जान लागेको बेलामा सलिभानको फोन कल चीन पुगेको हो । दुई देशको सम्बन्ध चिसिएकाले सलिभान र वाङबीचको फोनवार्ता सार्वजनिक नगरिएको हो । 

यस विषयमा ह्वाइट हाउस र अमेरिकास्थित चिनियाँ दूतावासले टिप्पणी गरेका छैनन् । यस विषयको खुलासा गर्ने अमेरिकी अधिकारीहरूले आफ्नो नाम खुलाउन चाहेनन् । 

अमेरिकाका राष्ट्रपति जो बाइडनले चिनियाँ समकक्षी सी चिनपिङसँग फोनमा कुरा गर्न चाहेको भए पनि चीन त्यसमा इच्छुक नरहेको बताइएको छ । त्यस फोनकललाई सम्भव बनाउनका लागि सलिभानले वाङसँग कुराकानी गर्न खोजेको हुन सक्ने बताइएको छ ।