नयाँ वर्ष २०८० तथा बिस्केट जात्राको अवसरमा भक्तपुरमा आज बिहीवारदेखि ‘सातौं भक्तपुर औद्योगिक, सांस्कृतिक, पर्यटन तथा व्यापार महोत्सव’ शुरू भएको छ ।

औद्योगिक शान्ति नेपाल संस्था, मध्यपुर ब्वाइज व्याण्डकोे आयोजना एवं भक्तपुर जिल्ला खेलकुद विकास समितिको सहयोगमा सल्लाघारीस्थित नेपाल ट्रस्टको जग्गामा महोत्सव आयोजना गरिएको हो । 

भक्तपुर आउने आन्तरिक तथा बाह्य पर्यटकलाई लक्षित गरी महोत्वस आयोजना गरिएको औद्योगिक शान्ति नेपालका अध्यक्ष सन्दिप महतले जानकारी दिए । महोत्सवमा खाद्यान्न, लत्ताकपडा, कृषि तथा हस्तकलाका सामग्री, भाँडाकुँडा, मोबाइल, सवारीसाधन लगायतका कक्ष रहेका छन् । सामानमा २०–५० प्रतिशतसम्म छुटको व्यवस्था गरिएको छ । 

अध्यक्ष महतका अनुसार महोत्सवमा करीब ५ लाख उपभोक्ताले अवलोकन गर्ने तथा १० करोडदेखि १२ करोड रुपैयाँसम्मको कारोबार हुने अपेक्षा गरिएको छ । 

महोत्सवका संयोजक एवं जिल्ला खेलकुद विकास समितिका अध्यक्ष दीपक थापाका अनुसार महोत्सवमा २०० कक्ष रहेका छन् । ‘घरायसी सम्पूर्ण सामान एकै ठाउँबाट सस्तो र सुलभरूपमा उपलब्ध गराउने उद्देश्यले महोत्सव आयोजना गरेका हौं,’ उनले भने । ११ दिनसम्म चल्ने महोत्सवमा विभिन्न कलाकारको सांगीतिक प्रस्तुति रहने बताइएको छ ।