सत्ता साझेदार दलहरूको बैठक प्रधानमन्त्री निवास बालुवाटारमा बसिरहेको छ । 

नयाँ गठबन्धन बनेसँगै मन्त्रिपरिषद् विस्तार भएपछि न्यूनतम् साझा कार्यक्रमबारे छलफल गर्न बैठक बसेको हो ।

सहमति जुटेपछि कार्यक्रम सार्वजनिक गर्ने तयारी गठबन्धनले गरेको छ ।

बैठकमा प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एकीकृत समाजवादीका अध्यक्ष माधवकुमार नेपाल लगायत गठबन्धनमा रहेका दलका नेताहरू सहभागी छन् । 

प्रधानमन्त्री प्रचण्ड नेतृत्वको सरकारबाट एमाले बाहिरिएर कांग्रेस सहभागी भएपछि दोस्रो पटक सरकारका न्यूनतम् साझा कार्यक्रम सार्वजनिक गर्न लागिएको हो ।

जनतालाई तत्काल राहत दिने कार्यक्रम समावेश गरेर बिहीवार नै कार्यक्रम सार्वजनिक गर्ने तयारी रहेको बालुवाटार स्रोतले जानकारी दियो ।