नेकपा एमालेका उपाध्यक्ष तथा पूर्वअर्थमन्त्री विष्णु पौडेलले बुटवलबाट राजधानी सरेको विषय अब छलफल गर्न आवश्यक नभएको बताएका छन् ।

प्रदेशको स्थायी राजधानीले बुटवललाई उछिन्न नसक्ने बताउँदै पौडेलले चिन्ता नलिन व्यवसायीलाई आग्रह गरे । 

होटल तथा रेष्टुरेन्ट व्यवसायी संघ, रूपन्देहीको २२ औं साधारणसभाको शुक्रबार बुटवल उद्घाटन गर्दै नेता पौडेलले भने, ‘प्रदेशको राजधानी दाङ जाँदैमा बुटवल भासिन्नँ, आकाश खस्दैन । प्रयास गर्दा गर्दै राजधानी सर्‍यो । अब यसैमा रूमलिन आवश्यक छैन । अब बुटवल/रुपन्देहीलाई के गर्नुपर्छ त्यसमा छलफल चलाऔँ ।’

उपाध्यक्ष पौडेलले थपे, ‘बुटवल अब सकियो भन्ने अतिरञ्जनापूर्ण सोचाइले आफैँलाई गलाउँछन् । बुटवल चारैतिरको एक्सिस छ । यहाँका निर्माणाधीन र निर्माणसम्पन्न भएका योजनाहरू पूरा भए बुटवल आर्थिक र पर्यटनको राजधानी बन्छ ।’ 

पौडेलले अहिलेको मुलुकको अस्थिर राजनीतिको उपज वर्तमान सत्ता गठबन्धन रहेको आरोपसमेत लगाए ।

देशलाई अस्थिरतामा धकेल्न दलहरू हुन भन्दै सबैलाई एउटै डोकोमा हाल्न नहुने उनको भनाइ थियो ।

देशमा कुनै एउटा दलको बहुमत नआएसम्म मुलुकले स्थिरता नहुने भनेका पौडेलले अबको ५ वर्षमा हुने निर्वाचनमा एमालेले बहुमत ल्याएर स्थायित्व दिने बताए । भने, ‘वर्तमान निर्वाचन प्रणालीले अरू दललाई एकल बहुमत ल्याउन कठिन छ । तर, एमालेले आउँदो निर्वाचनमा एकल बहुमत ल्याएर देखाउँछ ।’ 

नेता पौडेलले गौतमबुद्ध अन्तर्राष्ट्रिय, विमानस्थल, सभाहलदेखि सम्मेलन केन्द्र पूर्ण रूपमा सञ्चालन गरेर छाड्ने बताए ।

गौतबुद्ध विमानस्थल पूर्ण क्षमतामा चलाउन नागरिक उड्ड्यन प्राधिकरणले चासो नदेखाएको पनि उनको भनाइ थियो।

होटल व्यवसायी महासंघका पूर्वअध्यक्ष माधव नेपालले बुटवलमा २ वटा केवलकार एकसाथ सञ्चालनमा आउने तयारीमा रहेको बताउँदै त्यसपछि बुटवलमा पर्यटनको ओइरो लाग्ने बताए ।