०८ साउन २०८३, शुक्रबार
रूपन्देहीको भैरहवास्थित गौतमबुद्ध अन्तर्राष्ट्रिय विमानस्थल पूर्ण क्षमतामा सञ्चालन गर्न माग गर्दै निजी क्षेत्रले शुक्रबार धर्ना दिएको छ ।
राज्यले ४० अर्ब खर्चेर बनाएको देशको दोस्रो अन्तर्राष्ट्रिय एयरपोर्ट पूर्ण क्षमतामा चलाउन चासो नदिएको भन्दै निजी क्षेत्र संघर्षमा उत्रिएको हो ।
मुलुकको ४० अर्ब लगानी भई सञ्चालनमा आएको विमानस्थल पूर्ण रूपमा सञ्चालनका लागि सरकार, मन्त्रालय र सरोकारवाला निकायले चासो नदिएको उनीहरूको आरोप छ ।
उनीहरूले आफूहरूको आवाज नसुने कडा संघर्षमा उत्रिन बाध्य हुने चेतावनीसमेत दिए ।
चेम्बर अफ कमर्श रुपन्देहीका अध्यक्ष अनिलकुमार ज्ञवालीले विमानस्थललाई केन्द्रित गरी अर्बौँ रुपैयाँ लगानी गरेका पर्यटन व्यावसायीहरूको लगानी डुब्ने स्थितिमा आएको बताए ।
उनले भैरहवा, रुपन्देही, लुम्बिनी प्रदेश मात्रै नभई समग्र देशको विकासका लागि पनि विमानस्थल पूर्ण सञ्चालनमा ल्याउनुपर्नेमा जोड दिए ।
सञ्चालनमा आएको महिनौँ दिन बित्दासमेत अन्तर्राष्ट्रिय विमानस्थलमा साताको ३ दिन मात्रै एक-एक उडान हुँदै आएको छ ।
गत पुसमा मौसमको कारण देखाउँदै अन्तर्राष्ट्रिय उडान पूर्ण रूपमा रोकिएका थिए ।
विमानस्थलमा अन्तर्राष्ट्रिय उडानहरू थप नभए आन्तरिक उडान पनि ठप्प पार्न बाध्य हुने अध्यक्ष ज्ञवालीले चेतावनी दिए । दर्जन बढी निजी व्यावसायिक संस्थाहरूको ऐक्यबद्धता रहेको विरोध कार्यक्रम दबाबस्वरूप शान्तिपूर्ण धर्नामा बसेका हुन् ।
