२७ असार २०८३, शनिबार
काभ्रेपलाञ्चोकमा कोरोना भाइरसको नयाँ भेरियन्ट एक्सबीबी १.१६ का थप १४ संक्रमित भेटिएका छन् ।
गत १ हप्तामा नयाँ भेरियन्टका ११ संक्रमित देखिएकोमा शुक्रवार एकै दिन थप १४ संक्रमित भेटिएका हुन् ।
करीब ३ महिनापछि जिल्लामा पाइएको संक्रमण ५ महिलासहित २५ जनामा रहेको जनाइएको छ । जिल्ला स्वाथ्य कार्यालय धुलिखेलका अनुसार शुक्रवार संक्रमण पुष्टि भएकोमा बनेपा नगरपालिकाका २, धुलिखेलका २, पाँचखालका १, पनौतीका ७ तथा बेथानचोक र भुम्लु गाउँपालिकाका १/१ जना रहेका छन् ।
काभ्रेपलाञ्चोकमा गरिएको परीक्षणमा संक्रमण पुष्टि भएका सबैमा कोभिडको नयाँ भेरियन्ट एक्सबीबी १.१६ पुष्टि भएको कार्यालयका प्रमुख डा. पुरुषोत्तम सेढाइले बताए । सेढाइका अनुसार नमोबुद्ध नगरस्थित मेथिनकोट अस्पताल रुघाखोकी र ज्वरो आएर उपचारका लागि आएका बिरामीमा गरिएको परीक्षणमा नयाँ भेरियन्ट पुष्टि भएको छ ।
‘नयाँ भेरियन्ट परीक्षण गराउन खर्चिलो भएकाले थप बिरामीलाई कोभिड नेगेटिभ र पोजेटिभ मात्रै परीक्षण गर्न थालेका छौं,’ सेढाइले भने । उनका अनुसार थप पुष्टि भएका सबैको लक्षण एउटै भएकाले नयाँ भेरियन्टकै संक्रमित हुन् ।
काभ्रेपलाञ्चोकमा हालसम्म १८ हजार १७४ जनालाई कोभिड–१९ संक्रमण भएको थियो । यसमध्ये जिल्लाका १९६ जनाको मृत्यु भएको थियो ।
