संक्रमणकालीन न्याय निरुपण (टीआरसी) सम्बन्धी विधेयकलाई ‘फास्ट ट्रयाक’बाट सिधै पारित गर्न प्रमुख प्रतिपक्षी दल नेकपा एमाले असहमत भएको छ ।

सभामुख देवराज घिमिरेले बोलाएको प्रमुख दलका नेताहरूको छलफलमा सहभागी एमाले अध्यक्ष केपी शर्मा ओलीले संसदमा पुगेको विधेयकमा कुनै न कुनै समितिमा छलफल हुनुपर्ने अडान लिएका छन् ।

संक्रमणकालीन न्याय निरुपण छिटो टुंग्याउनुपर्ने भएकाले विधेयकलाई सिधै पारित गर्नुपर्ने प्रस्ताव सत्तापक्षले राखेको थियो । सत्तापक्षबाट प्रधानमन्त्री पुष्पकमल दाहाल ‘प्रचण्ड’ र नेपाली कांग्रेसका सभापति शेरबहादुर देउवा बैठकमा सहभागी थिए ।

बैठकपछि प्रतिक्रिया दिँदै एमाले अध्यक्ष ओलीले विधेयकलाई सिधै पारित गर्न नसकिने बताएका छन् ।

सत्तारुढ गठबन्धनले संक्रमणकालीन न्याय सम्बन्धी विधेयकहरू संसदबाट फास्ट-ट्रयाकमा पारित गर्न प्रस्ताव गरेपनि प्रतिपक्षले अस्वीकार गर्दै आएको छ । 

सरकारको नेतृत्वकर्ता दल नेकपा माओवादी केन्द्रका प्रमुख सचेतक हितराज पाण्डेले विधेयकहरू फास्ट ट्रयाकमा पारित गर्नुपर्ने प्रस्ताव गरेपछि सभामुख घिमिरेले दलका शीर्ष नेतासँग छलफल गरेका हुन् ।