०२ असार २०८३, मंगलबार
जुम्लाको पातारासी गाउँपालिकाले बालविवाह रोकथाम गर्न विवाहका लागि वडाको सिफारिस अनिवार्य गरेको छ ।
उक्त पालिका- ५ मा पर्ने दुर्गम ४ वटा गाउँलाई बालविवाहमुक्त गाउँ घोषणा गरिएको छ ।
दिगो विकासको लक्ष्यअनुरूप पातारासीका गाउँलाई बालविवाहमुक्त घोषणा गरिएको गाउँपालिका अध्यक्ष पूर्णसिंह बोहोराले जानकारी दिए।
यहाँका ८ वटा स्थानीय तहका ६० वडामध्ये पातारासी गाउँपालिका–५ वडालाई बालविवाहमुक्त घोषणा गरिएको छ ।
अध्यक्ष बोहोराले भने, 'विवाह उमेर समूहका २० वर्षमुनिका कुनै पनि बालबालिकाले विवाह नगरेको सर्वेक्षणबाट देखिएपछि बालविवाहमुक्त गाउँ घोषणा गरिएको हो ।'
अब अरू वडालाई छिट्टै बालविवाहमुक्त गरिने भएको छ । स्थानीय सरकारको प्राथमिकतामा परेको सामाजिक विकृति रोकथाम गर्न यो महत्वपूर्ण काम भएको गाउँपालिका उपाध्यक्ष जनमाया रोकायाले बताइन्।
बालविवाहमुक्त घोषणाका लागि ३ वर्षदेखि बाल क्लब, वडा सरकार, समूह परिचालन तथा यससम्बन्धी परियोजना लागू गरेर अन्ततः बालविवाह शून्यमा झार्न सफल भएको पातारासी गाउँपालिका महिला तथा बालबालिका शाखा प्रमुख भगवती गिरीले जानकारी दिइन्।
