१० साउन २०८३, आइतबार
मौसम बिग्रिएर कम भिजिबिलिटी भएका कारण आज आइतवार विहानभर त्रिभुवन विमानस्थलबाट उडान अवतरण गर्ने जहाजलाई समस्या भएको छ ।
कम भिजिबिलिटीका कारण काठमाडौं विमानस्थलबाट विभिन्न गन्तव्यमा जाने जहाजको उडान तथा अवतरण प्रभावित भएको छ । जसका कारण त्रिभुवन अन्तर्राष्ट्रिय विमानस्थलमा भिड बढेको छ ।
आन्तरिक उडानहरू ढिलो भइरहेका छन भने अन्तर्राष्ट्रिय उडानका वायुसेवालाई नै आवश्यक भिजिबिलिटी नपुगेका कारण अवतरण गर्न सकेका छैनन् ।
दोहाबाट आएको कतार एयरवेजको जहाज डेढ घण्टादेखि (विहान पौने ११ बजेसम्म) आकासमै फन्को मारेर बसिरहेको छ । यो जहाजले एक पटक अवतरण गर्ने प्रयास गरेपछि सफल भएन । जहाज ओभरसुट गरेर पुनः आकासमै होल्ड गरिरहेको त्रिभुवन अन्तर्राष्ट्रिय विमानस्थलका प्रवक्ता टेकनाथ सिटौलाले बताए ।
विमानस्थलको टर्मिनल ड्युटी अफिसर (टीडीओ)का अनुसार कतार एयरलाइन्सले पुग्ने भिजिबिलिटी भएकोले पौने ११ बजेपछि भने अवतरण गरेको विमानस्थल कार्यालयले जानकारी दिएको छ ।
आन्तरिक उडानको हकमा भने सिमरा विमानस्थल साढे १० बजे खुलेको छ । पोखरा र भरतपुर विमानस्थल भने अझै खुलेका छैन ।
अन्य विमानस्थलको उडान अवतरण सामान्य रहेको पनि विमानस्थल कार्यालयले जानकारी दिएको छ ।
