०८ साउन २०८३, शुक्रबार
सूर्य नेपाल गल्फ टुर २०२२–२३ अन्तर्गत सातौं प्रतियोगिता सूर्य नेपाल एनपीजीए टुर च्याम्पियनसिप आजदेखि गोकर्ण गल्फ क्लबमा हुँदैछ ।
७२ होलको प्रतियोगिता आजदेखि शुरू भएर बिहीवारसम्म चल्नेछ । कूल ८ लाख नगद पुरस्कार राशीको प्रतियोगितामा ३२ प्रोफेसनल र ८ एमेच्योर खेलाडीले प्रतिस्पर्धा गर्नेछन् ।
३६ होलको समाप्तीमा कट लागू हुनेछ । जहाँ उत्कृष्ट २१ प्रोफेसनल र टाइमा पर्ने खेलाडी तथा कम्तीमा ६ एमेच्योर खेलाडीले अन्तिम २ दिनका लागि स्थान बनाउनेछन् ।
विजेताले उपाधिसँगै १ लाख ४० हजार प्राप्त गर्नेछ । दोस्रो हुनेले ९० हजार र तेस्रो हुनेले ६७ हजार प्राप्त गर्नेछन् । उत्कृष्ट २१ भित्र पर्ने अन्य प्रोफेसनल खेलाडीले पनि नगद पुरस्कार प्राप्त गर्नेछन् ।
व्यावसायिक गल्फर भुवन नगरकोटी, जयराम श्रेष्ठ, धन थापा, निरज तामाङ, रामे मगर र रवि खड्कालाई प्रमुख दाबेदारको रूपमा हेरिएको छ तर यी शीर्ष वरियताका गल्फरहरूले छैटौं प्रतियोगिताका विजेता सद्भाव आचार्य र १३औं दक्षिण एसियाली खेलकुद सागका दोहोरो स्वर्ण विजेता सुवास तामाङको चुनौती पन्छाउनुपर्नेछ ।
अन्य एमरच्योर गल्फरहरू टासी छिरिङ, वाङचेन ढोन्डुप र विजय श्रेष्ठ आइनहाउसले पनि उत्कृष्ठ प्रदर्शन गर्ने अपेक्षा गरिएको छ ।
गोकर्ण गल्फ कल्बले प्रतियोगिताको लागि सबै तयारी पूरा गरेको छ । पीजीए नेपालका अध्यक्ष रवीन्द्रमान श्रेष्ठले यो वर्ष एमेच्योर र प्रोफेसनल गल्फरहरूबीच कडा प्रतिस्पर्धा भइरहेको र यसले नेपाली गल्फ विकासको लागि सहयोग पुग्ने बताए ।
नेपाली गल्फको विकासमा निरन्तर सहयोग गरेकोमा प्रायोजक सूर्य नेपाल प्रालिलाई उनले धन्यवाद प्रदान गरेका छन् ।
