०६ असार २०८३, शनिबार
यही वैशाख १ गतेबाट प्रदर्शनमा आएको चलचित्र “जारी” युरोपमा प्रदर्शन शुरू गरिएको छ।
बेल्जियमको ब्रुज शहरमा रहेको लिमेरे सिनेमा हलमा उपस्थित भएर सयौं नेपालीहरूले उपेन्द्र सुब्बाद्वारा निर्देशित फिल्म ‘जारी’ हेरेका छन् ।
‘चरी बस्यो’ गीतको लोकप्रियता र बलियो स्टारकास्टका कारण नेपालमा मात्र होइन, विदेशमा समेत यस फिल्मको पखाई थियो। यो गीतमा टिकटक बनाउनेहरूको लर्को नै थियो। फिल्म हलमा भेटिएकी २१ वर्षीया उमा थापाले भनिन्- “म त टिकटकमा गीत सुनेर आएको, चरी बस्यो भन्ने गीत निकै मन पर्छ, फिल्म पनि राम्रै होला ।”
आफ्ना साना स्कूले केटाकेटी समेत लिएर हलमा आएका राजन राईले फिल्मले नेपाली सभ्यता र प्रकृतिलाई सुन्दर देखाएको बताए।
“मैले नानीहरू सबैलाई पहिल्यैदेखि जानुपर्छ है जारी फिल्म हेर्न भनेको थिएँ, आज लिएर आएँ किनकी यो फिल्मले नेपाल चिनाउन मद्दत गरेको छ । यहीँ जन्मेका नानीहरूलाई आफ्नो इतिहास थाहा पाउन जारीले मद्दत गरेको छ ।”
निकै उत्सुकताका साथमा फिल्म हेर्न आएकी निशा लिम्बूले यो पूर्वको कुनै गाउँतिरको जस्तै कथा भएको बताइन् ।
उनले भनिन्, “यो फिल्म हेर्दा नुमाफुङ सम्झिरहेको थिएँ । फेरि एकपटक नुमाफुङ हेर्ने इच्छा बढाएको छ । फिल्मले दिन खोजेको सन्देश अर्ग्यानिक छ ।”
कतिपयले आफूहरू दयाहाङ राई र मिरुना मगरको अभिनय हेर्न मात्रै आएको प्रतिक्रिया दिएका थिए ।
जारी प्रथामाथि आधारित भएर निर्माता रामबाबु गुरुङले निर्माण गरेको यो फिल्ममा अर्ग्यानिक स्वाद भएको दर्शकहरूले बताएका छन् ।
लिम्बू समुदायमा प्रचलित जारी प्रथालाई आधार बनाएर बनाइएको फिल्ममा कलाकार दयाहाङ राई, मिरुना मगर, विजय बराल, रोयदीप श्रेष्ठ, कमलमणि नेपाल, पुष्कर गुरुङ, प्रेम सुब्बा, रेखा लिम्बूलगायतको अभिनय रहेको छ।
