०९ असार २०८३, मंगलबार
चीनले दक्षिणी ध्रुवमा आफ्नो उपस्थिति बढाउँदै लगेको अमेरिकाको एक थिंकट्यांकले संकलन गरेको तस्वीरहरूले देखाएको छ ।
सन् २०१८ पछि पहिलोपटक चीनले त्यहाँ निर्माणको काम थालेको छ ।
हालैका वर्षमा बेइजिङले उत्तरी ध्रुवमा जहाजका नयाँ मार्ग बनाउन अनि दक्षिणी ध्रुवमा अनुसन्धानको दायरा फराकिलो पार्न प्रयास गरिरहेको छ ।
यसमार्फत चिनियाँ जनमुक्ति सेनालाई निगरानी क्षमता बढाउन सहज हुने भनी पश्चिमी सरकारहरूले चिन्ता व्यक्त गरेका छन् ।
रोस समुद्र नजिक इनएक्सप्रेसिबल टापुमा चीनले बनाएको नयाँ स्टेशनमा वेधशाला (अन्तरिक्ष हेर्ने ठाउँ) बनाएको देखिन्छ । यसले चीनलाई एन्टार्कटिका महादेशभरि पहुँच प्राप्त गर्नका लागि सहयोग गर्ने सेन्टर फर स्ट्राटेजिक यान्ड इन्टरनेशनल स्टडीज (सीएसआईएस) को प्रतिवेदनमा उल्लेख छ ।
सीएसआईएसले जनवरी महिनामा लिएको भूउपग्रहीय तस्वीरबाट नयाँ संरचनाको पहिचान गरेको हो । चीनले अस्थायी भवन, हेलिकप्टर प्याड र ठूलो मूल भवनको आधारशिला पनि बनाएको छ । उक्त भवन सन् २०२४ को अन्त्यसम्ममा तयार भइसक्नेछ ।
यस स्टेशनले अस्ट्रेलिया र न्युजील्यान्डबाट सिग्नल इन्टेलिजेन्स संकलन गर्नेछ । अस्ट्रेलियाको नयाँ आर्नहेम स्पेस सेन्टरबाट प्रक्षेपण गरिएका रकेटको टेलिमेट्री डेटा पनि यसले थाहा पाउनेछ ।
स्टेशन बनिसकेपछि चीनको स्वेलोङ आइसब्रेकर जहाजहरू अड्याउने घाट पनि तयार हुनेछ ।
