२७ जेठ २०८३, बुधबार
चितवन २ को उपनिर्वाचनमा रवि लामिछानेसँग फराकिलो मतान्तरले पराजित भएका कांग्रेस उम्मेदवार जीतनारायण श्रेष्ठले अन्तर्घात नभइ पुराना दलमा नागरिकले परिवर्तन खोजेको बताएका छन् । रविलाई जितको बधाई दिँदै श्रेष्ठले आम जनताले पुराना दलमा परिवर्तन खोजेको र सच्चिनका लागि दबाब दिएको बताएका हुन् ।
‘यो मतलाई सम्मान गर्नुपर्छ । किनकी हामी लोकतन्त्रलाई सम्मान गर्ने पार्टी हौं । जनमतलाई स्वीकार गर्छु । जनताले परिवर्तन चाहेको कुरालाई यसले देखाएको छ । परम्परागत दल पुरानो होइन नयाँ ढंगबाट पार्टी संचालन र जनताको सेवामा लाग्नुपर्छ’ श्रेष्ठले रविसँगै उभिएर भने, ‘अझै मैंले जनताको बीचमा काम गर्न बाँकी रहेछ भन्ने परिणामले देखायो । तर घात र अन्तर्घातले म हारेको होइन । तनहुँको चुनावले पनि देखाएको छ कि राष्ट्रिय र पुराना दलप्रति आम जनताले परिवर्तन खोजेका छन् । दललई सच्चिनको लागि दबाब हो । जनताले परिवर्तन खोजेको कुरा र हाम्राे कमीकमजोरीलाई सच्याउँनुपर्छ ।’
नयाँ जोश र जाँगरका साथ हिँडेका रविलाई आफ्नो सहयोग हुने पनि उनले बताए ।
‘रविजी जोश र जाँगरसाथ हिड्नुभएको छ । म प्रतिस्पर्धी उम्मेदवारको हैसियतले उहाँले गर्ने हरेक रचनात्मक कामलाई सहयोग गर्छु । उहाँँको जिम्मेवारी बढी छ । मैंले गर्नुपर्ने सहयोग दलबाट माथि उठेर गर्न पनि तयार छु’, उनले भने, ‘उहाँ युवा हुनुहुन्छ । राष्ट्रले अपेक्षा गरेको छ । उहाँ अब मेरो पनि प्रतिनिधि हो ।’
