०२ असार २०८३, मंगलबार
काबुल विमानस्थलमा बम विस्फोट गरी सामूहिक हत्याको योजना बनाउने इस्लामिक स्टेटको मान्छेलाई तालिबानले मारेको अमेरिकी अधिकारीहरूले बताएका छन् ।
सन् २०२१ को अगस्टमा अमेरिका अफगानिस्तानबाट बाहिरिँदै गर्दा काबुल विमानस्थलमा गरिएको आत्मघाती बम विस्फोटमा परी १७० सर्वसाधारण र १३ अमेरिकी सैनिक मारिएका थिए । तालिबानले देशका अन्य भागसँगै काबुल पनि नियन्त्रणमा लिएपछि मानिसहरू विमानस्थलबाट भाग्न खोज्दै थिए ।
आईएसका ती व्यक्ति हप्तौंअघि मारिएको तर उनको मृत्युको पुष्टि हुन समय लागेको अमेरिकी अधिकारीहरूको भनाइ छ ।
मारिने व्यक्तिको नाम सार्वजनिक गरिएको छैन ।
संकलन गरिएको सूचना तथा निगरानीमार्फत ती आईएस नेताको हत्याको सुनिश्चितता आफूहरूले गरेको अमेरिकी अधिकारीहरू बताउँछन् र ती व्यक्ति नै बम आक्रमणका लागि जिम्मेवार थिए भन्ने निष्कर्ष कसरी निकालिएको हो भनी विस्तारमा उनीहरूले खुलाउन चाहेनन् ।
उक्त बम विस्फोटमा मारिएका अमेरिकी सैनिकको परिवारलाई आईएस नेताको हत्याको जानकारी अमेरिकाले सोमवारदेखि दिन थालेको छ ।
