अनशनरत घिमिरेको जीवन रक्षा गर्न मानव अधिकार आयोगको आग्रह

राष्ट्रिय मानव अधिकार आयोगले किसान श्रीराम घिमिरेको जीवन रक्षा गर्न माग गरेको छ । आयोगले बिहीवार एक विज्ञप्ति जारी गर्दै आमरण अनशनरत घिमिरेको स्वास्थ्य अवस्थाप्रति गम्भीर ध्यानाकर्षण भएको जनाएको छ ।

कृषक परिचय पत्रको व्यवस्था गर्न, न्यूनतम ब्याजदरमा ऋण उपलब्ध गराउन, मल, बीउ, विषादी कृषियन्त्रहरु पूर्णरुपमा अनुदान उपलब्ध गराउन माग गर्दै नुवाकोटका किसान घिमिरे बैशाख ५ गतेदेखि काठमाडौंको भूगोलपार्कमा आमरण अनशनमा बसेका छन् ।

आयोगले अनशनरत घिमिरेको स्वास्थ्य अवस्थाप्रति संवेदनशील भई जीवनको अधिकारको रक्षा गर्न, सार्थक वार्ताको माध्यमबाट तत्काल समस्याको समाधान गर्न, किसानको अधिकारका सम्बन्धमा आयोगबाट विगतमा गरिएका सिफारिसहरुको कार्यान्वयन गर्न सरकारलाई आग्रह गरेको छ ।​

घिमिरेको शरीरमा ग्लुकोज र अक्सिजनको मात्रा कम भई स्वास्थ्य अवस्था जटिल बन्दै गइरहेको आयोगका प्रवक्ता टीकाराम पोखरेलले जानकारी दिएका छन् ।