प्रमुख प्रतिपक्षी दल नेकपा एमालेले अयोग्य लडाकूको नाममा राज्यकोषबाट रकम बाँड्न लागिएको प्रति आपत्ति जनाएको छ । यो निर्णय फिर्ता नभए चुप लागेर नबस्ने एमालेको चेतावनी छ ।

शुक्रवार बसेको प्रतिनिधिसभा बैठकको शुरूमै सभामुखसँग समय लिएर एमाले प्रमुख सचेतक पदम गिरीले देशको अर्थतन्त्र धरासायी भएको समयमा अयोग्य लडाकूका नाममा पैसा बाँड्ने निर्णय स्वीकार्य नभएको बताए । 

‘अनमिनको प्रमाणीकरणमा हुँदै नभएका लडाकूको नाममा माओवादी नेतृत्वले यसअघि नै ९५ करोड लगेको थियो । त्यसको हिसाबकिताब छैन । महालेखाले प्रश्न उठाएको थियो,’ गिरीले भने, ‘अहिले गरीबले नूनतेल किन्न नसक्ने अवस्थामा राज्य कोषबाट २ लाखका दरले पैसा दिने भन्ने निर्णय गरिएको छ । दिनदहाडै देश लुटिएको छ । यो निर्णय फिर्ता गर्नुपर्छ । हाम्रो यो शदासयतालाई सुन्ने काम भएन भने यसकाविरुद्ध जस्तोसुकै कदम चाल्न बाध्य हुनेछौं ।’

यसअघि बिहीवार मन्त्रिपरिषद् बैठकमार्फत कार्यविधि संशोधन गर्दै सरकारले अयोग्य लडाकूलाई प्रतिव्यक्ति २ लाख दिने निर्णय गरेको समाचार प्रकाशित भएको थियो ।