०२ असार २०८३, मंगलबार
खोटाङको हलेसी तुवाचुङ नगरपालिकाले सामुदायिक विद्यालयको शैक्षिक गुणस्तर सुधार गर्ने उद्देश्यका साथ नगर स्तरीय वार्षिक परीक्षा लिएको थियो ।
यसअघिसम्म ८ कक्षाको मात्रै नगर स्तरीय परीक्षा सञ्चालन गर्दै आएको हलेसी तुवाचुङले गत चैत ९ देखि १६ गतेसम्म ४ देखि ९ कक्षासम्मको नगरस्तरीय वार्षिक परीक्षा सञ्चालन गरेको हो ।
४ र ५ कक्षा सञ्चालन भइरहेका ४२ र ६ देखि ८ कक्षा सञ्चालन भइरहेका १५ आधारभूत तथा १२ माध्यमिक विद्यालयलाई वार्षिक परीक्षामा सहभागी गराइएको थियो । नगरपालिकाले सञ्चालन गरेको नगरस्तरीय बाह्य मूल्यांकनमा देखिएको विद्यार्थी उत्तीर्ण प्रतिशत भने निराशाजनक छ ।
जनता मावि सल्लेका ४ कक्षामा अंग्रेजी, नेपाली, गणित र सामाजिक विषयमा कुनै पनि विद्यार्थी उत्तीर्ण भएनन् । ४ कक्षामा विज्ञानमा १ जना मात्र विद्यार्थी उत्तीर्ण हुन सफल भएको पाइएको छ । सोही माविको ७, ८ र ९ कक्षामा गणितमा उत्तीर्ण दर शून्य देखिएको छ । ६ कक्षामा गणितमा १ र सामाजिकमा २ जना मात्र उत्तीर्ण भएका छन् । ७ कक्षामा सामाजिकमा १ जना उत्तीर्ण भएका छन् ।
कुनै पनि विषयमा उत्तीर्ण हुनका लागि विद्यार्थीले आन्तरिक र बाह्य मूल्यांकनमा न्यूनतम ३५ प्रतिशत अंक प्राप्त गर्नुपर्ने हुन्छ । ज्योति मावि राजापानीको ४ कक्षामा गणित, सामाजिक र विज्ञानमा १ जना पनि विद्यार्थी उत्तीर्ण हुन सकेनन् । ५ कक्षामा पनि गणितमा नतिजा ० देखिएको छ । ६ कक्षामा अंग्रेजीमा २, नेपाली, गणित, सामाजिक र विज्ञानमा १–१ जना उत्तीर्ण भएका छन् । ७ कक्षामा गणितमा १ जना मात्रै उत्तीर्ण भएका छन् ।
८ कक्षामा अंग्रेजीमा ३, नेपालीमा ३, गणितमा १, सामाजिकमा ३ र विज्ञानमा १ तथा १० कक्षामा गणितमा १ जना मात्र उत्तीर्ण भएका छन् । आन्तरिक मूल्यांकनतर्फ सम्बन्धित विद्यालयले पहिलो र दोस्रो त्रैमासिक परीक्षा सञ्चालन गरेको थियो ।
