१३ असार २०८३, शनिबार
रुसका राष्ट्रपति भ्लादिमिर पुटिनलाई मार्ने उद्देश्यले गरिएको ड्रोन आक्रमणमा अमेरिकाको समर्थन रहेको रुसले बिहीवार आरोप लगाएको छ ।
क्रेमलिनका प्रवक्ता दिमित्री पेस्कोभले पत्रकारहरूसँग कुराकानीका क्रममा यो आरोप लगाएका हुन् । वाशिङटनले आक्रमणका निशानाहरूको छनोट गरिरहेको र युक्रेनले त्यसलाई कार्यान्वयन गरिरहेको पेस्कोभको भनाइ छ ।
युक्रेनले यस आक्रमणमा आफ्नो कुनै हात नरहेको बताएको छ ।
‘यस घटनामा आफ्नो संलग्नता नरहेको भनी किएभ र वाशिङटनले प्रयास गरेको भए पनि त्यो वाहियात हो । यस्ता आतंकवादी आक्रमणबारेमा निर्णय किएभमा नभई वाशिङटनमा बन्ने गर्छन् भन्ने कुरा हामीलाई थाहा छ,’ पेस्कोभले थपे ।
रुसले यस घटनाको उचित जवाफ फर्काउने पेस्कोभको भनाइ छ । रुससँग प्रत्याक्रमणका अनेकौं विकल्प रहेको उनको भनाइ छ । घटनाको अनुसन्धान चलिरहेको जानकारी उनले दिए ।
