कटेरोबाट थालेको कार्की होटलको खाना : ग्राहकले रुचाएको ‘ब्रान्ड’

विराटनगरदेखि पूर्व लाग्ने र झापाको बिर्तामोडदेखि पश्चिम लाग्नेहरू खाना खानकै लागि कार्की होटलमा आउने गर्छन् । होटल मोरङको बेलबारीमा छ ।

२०६४ सालमा चन्द्र कार्की र कुमारी कार्कीले मोरङकै बेलबारी बजारमा होटल सञ्चालन गरेका थिए । 

त्यतिबेला राजमार्गका होटलहरूमा खाना राम्रो पाइँदैन भन्ने गुनासो बढी हुने गरेको थियो । राजमार्गका होटलमा बासी खानेकुरा खुवाउँछन् भन्ने हल्ला अहिले पनि कहीँकतै सुन्ने गरिएको छ ।

यस्तै बेला कार्की दम्पतीले एक छाप्रोबाट होटल सञ्चालन गरेका थिए । ग्राहक देउता हुन् भन्ने ठानेर उनीहरूले ताजा खाना खुवाउने गरे । त्यो उनीहरूका लागि सफलता बन्यो । धार्मिक यात्रा गर्नेदेखि नेताहरू समेतको रोजाइमा परेको छ बेलबारीको कार्की होटेल ।

अहिले उनीहरूको होटल ब्रान्ड जस्तै बनेको छ । होटल स्थापना गर्दा उनीहरूलाई ब्रान्ड नै होला भन्ने लागेको थिएन । 

होटल खोल्नुअघि मोरङकै लेटाङमा कृषि कर्म गर्थे चन्द्र कार्की । जग्गा अधियामा लिएर उनीहरूले गाईवस्तु पालेर दूध, दही, घ्यू बेच्ने गरेका थिए । चन्द्रकी पत्नी कुमारी कार्कीलाई ज्योतिषीले हात हेराउँदा सेतो चिजको व्यापार गरे राम्रो हुने बताएका थिए । ज्योतिषीकै सुझावअनुसार कुमारीकै जोडबलमा दूध, दही तथा घ्यु बेच्ने गरेका थिए । उनीहरूलाई त्यो पेशा पनि फाप्यो । कार्की दम्पतीको लगनशीलता देखेर १ जना आफन्तले होटल सञ्चालन गर्न सुझाव दिएका थिए । कार्की दम्पतीले ज्योतिषीले भनेको कुरा ती आफन्तलाई सविस्तार वर्णन गरे । ती आफन्तले भात पनि सेतै हुन्छ, बेलबारी पूर्वपश्चिम राजमार्ग पनि, त्यहाँ होटल गर्न सुझाव दिएपछि कार्की दम्पती मन्जुर भएर होटल खोलेका हुन् ।

शुरूमा बेलबारीमा एउटा सामान्य छाप्रोमा होटल सञ्चालन गरेका थिए । ७ हजार महिनाको तिर्ने गरी सामान्य कटेज भाडामा लिएर होटल खोलेका थिए । शुरूशुरूमा सबै काममा उनीहरू आफैं खट्ने गरेका थिए । बिहानदेखि राति अबेरसम्म पनि भात खान आउनेलाई खुवाउने गरेका थिए । खाना खाने आउँदै गर्छन्, पकाउँदै दिँदै गरेकाले ताजा खाना खान पाइन्छ भनेर ग्राहकको भीड हुन थाल्यो ।

कार्की परिवार राम्रोसँग चलिरहेको थियो । उनीहरूका ३ छोराछोरी थिए, २ छोरा र १ छोरी । तीनै जनालाई होटलकै कमाइले पढाइरहेका थिए । २०७५ सालमा कार्की परिवारमा बज्रपात पर्‍यो । व्यापार–व्यवसाय राम्रोसँग ‘पिकअप’ लिएका बेला चन्द्रबहादुरको निधन भयो । 

चन्द्रको निधनपछि अब कार्की होटल बन्द हुन्छ भन्ने धेरैको अनुमान थियो । ब्रान्ड नै बनेको होटल बन्द हुन्छ भन्ने चिन्ताले धेरैलाई सतायो । छोराछोरी सानै भएका र आमाले मात्रै सञ्चालन गर्न समस्या हुन्छ भन्ने अनुमान यतिबेला गलत भएको छ ।

बुवाले सञ्चालन गरेको व्यवसाय तथा आमाको हेरचाहदेखि भाइबहिनीको पठनपाठनसम्मको जिम्मा जेठा छोरा अभिषेकको काँधमा आयो तर आम अनुमानलाई फेल गर्दै अभिषेकले बुवाको ब्रान्डलाई कायमै राखेका छन् ।

बुवा चन्द्रको निधन हुँदा अभिषेक भर्खर १८ वर्षका मात्रै थिए । १२ कक्षामा पढ्दै थिए । १२ कक्षा सकेर उच्च शिक्षा जापानमा गएर पढ्ने उनको सपना थियो तर बुवाको मृत्यु कारण उनको जापान सपनामा ब्रेक लाग्यो ।

भाइबहिनीलाई उनले पढाइरहेका छन् । भाइ अनुप कार्की सीए पढ्दै छन् भने उनले बीबीएस प्रथम वर्षको परीक्षा पनि लेखेका छन् । बहिनी अनुसा बीबीए पढ्दैछिन् । अभिषेक भर्खर २३ वर्षका मात्रै भए । अनुप २१ वर्षका भए भने बहिनी अनुसा २० वर्षकी भइन् । 

कार्की होटलमा चिया पिउँदै विद्यार्थी राजनीति गरेका नेताहरू सांसद, मन्त्री र पार्टीको नेतृत्व तहमा पुगेका छन् तर यसले आफ्नो ब्रान्डलाई घट्न दिएको छैन । जग्गा–जमिन खरिद गर्नुभन्दा पनि भाइबहिनीकै शिक्षालाई अभिषेकले प्राथमिकता दिएका छन् ।

‘बुवाको निधनपछि मैले पढ्न सकिनँ,’ उनले भने, ‘तर भाइबहिनीलाई पढाउनका लागि कुनै पनि कसर बाँकी राख्दिनँ ।’

भारतको वेस्ट बंगाल, चीन तथा पश्चिम नेपालका आन्तरिक र बाह्य पर्यटक र यात्रुहरू कार्की होटलमा आउने गरेका छन् । सहकारी, विभिन्न साहित्यिक कार्यक्रम र शैक्षिक भ्रमणमा आउनेहरू भात खान कार्की होटलमा आउने गरेका छन् । पूर्वका पर्यटकीयस्थल घुम्न आउनेदेखि धार्मिकस्थल हुँदै सहकारीको अवलोकन गर्न आउनेहरूको खाना खाने स्टेसन बनेको छ कार्की होटल ।

कटेरोबाट थालेको व्यवसायले घर बनाउने अवसर पनि दिएको छ । घर बनाउने मुख्य आम्दानीको स्रोत नै त्यही कार्की होटल हो ।