फूटबल सुपरस्टार लियोनल मेसीलाई वर्षका उत्कृष्ट खेलाडीका रूपमा लौरियस पुरस्कार प्रदान गरिएको छ ।

पेरिसमा सोमवार आयोजित समारोहमा मेसीले यो पुरस्कार पाएका हुन् । अर्जेन्टिनालाई विश्वकप जिताउनका लागि निर्णायक योगदान गरेकाले मेसीलाई पुरस्कार दिइएको हो । 

पुरस्कार ग्रहण गरेपछि मेसीले भने, ‘यो विशिष्ट सम्मान हो किनकि पेरिसमा यसको आयोजना गरिएको छ । सन् २०२१ मा म पेरिस आएदेखि यस शहरले म र मेरो परिवारलाई न्यानो स्वागत गरेको छ ।’

‘म आफ्नै सबै साथी खेलाडीहरूलाई धन्यवाद दिन्छु । राष्ट्रिय टोलीको मात्र नभई पीएसजीका साथीप्रति पनि म आभार प्रकट गर्छु । मैले यी सबै उपलब्धि एक्लैले हासिल गरेको हैन । साथीहरूसँग सबै कुरा साझा गर्न पाउँदा म कृतज्ञ छु ।’

महिलातर्फ जमैकाकी धाविका शेली–यान फ्रेजर–प्राइसले लौरियस पुरस्कार पाएकी छन् ।