०९ साउन २०८३, शनिबार
सुदूरपश्चिम प्रदेश सभाको चौथो ठूलो दल नागरिक उन्मुक्ति पार्टीले संसदीय दलको नेता र प्रमुख सचेतक फेरेको छ ।
बुधवार बसेको संसदीय दलको बैठकले घनश्याम चौधरीलाई दलको नेता चयन गरेको छ ।
उनी कैलाली निर्वाचन क्षेत्र ३ को प्रदेशसभा (१) बाट निर्वाचित भएका हुन् । प्रमुख सचेतकमा खुशीराम चौधरी चयन भएका छन् ।
यसअघि पार्टी संसदीय दलको नेतामा रामेश्वर चौधरी र प्रमुख सचेतकमा लक्ष्मणकिशोर चौधरी थिए ।
निवर्तमान प्रमुख सचेतक लक्ष्मणकिशोर चौधरीले केन्द्रीय अध्यक्षको उपस्थितिमा केन्द्रमा केही दिनअघि भएको सहमतिबमोजिम बुधवार प्रदेशसभा संसदीय दलको बैठक बसेर दलको नेता र प्रमुख सचेतक चयन गरिएको जानकारी दिए ।
‘बैठकले दलको नेता र प्रमुख सचेतक सर्वसम्मतिले चयन गरेको छ,’ उनले भने, ‘यसबाहेक योजना छनोट लगायतका विषयमा छलफल गरिएको छ ।’ ५३ सदस्यीय प्रदेश सभामा पार्टीका ७ सदस्य छन् ।
प्रदेश सभामा नेपाली कांग्रेसका १९, नेकपा माओवादी केन्द्रका ११, नेकपा एमालेका १०, नेकपा एकीकृत समाजवादीका ४, राप्रपाका १ र स्वतन्त्र १ सदस्य छन् ।
