२७ असार २०८३, शनिबार
अभिनेता पल शाहको कमब्याक म्युजिक भिडियो सार्वजनिक भएको छ ।
एक वर्षको कारागार बसाइबाट रिहा भएको दुई महिनापछि बिहीवार उनको अभिनय रहेको ‘तिमीलाई हेर्ने बानी पर्यो’ बोलको गीत सार्वजनिक भएको हो ।
यो फिमेल भर्सनको गीतमा अनु चौधरीको स्वर छ ।
पलको आफ्नै निर्देशनमा तयार भिडियोमा उनीसँगै मोडल सनिशा भट्टराईको अभिनय छ ।
पलले आफूले भोगेको वास्तविक जीवनको कथालाई भिडियोमा प्रस्तुत गरेका छन् । पक्राउदेखि कारागारबाट रिहासम्मको सन्दर्भ पलले भिडियोमा प्रस्तुत गरेका छन् ।
पुष्पन प्रधानको शब्द, संगीत र स्वरमा ‘तिमीलाई हेर्ने बानी पर्यो’को मेल भर्सन डेढ वर्षअघि सार्वजनिक भएको थियो । स्रोता दर्शकले रुचाएको सोही गीतको फिमेल भर्सनबाट पलले अभिनयमा कमब्याक गरेका हुन् ।
राजिव समरको कोरियोग्राफी, अर्जुन तिवारीको डिओपी, बुद्ध थापाको छायाँकन रहेको भिडियोलाई सुप्रिम पराजुलीले सम्पादन गरेका हुन् ।
पलले आफ्नै अफिसियल युट्युबमार्फत यो भिडियो सार्वजनिक गरेका हुन् ।
