१४ असार २०८३, आइतबार
भारतले उपनिवेशकालमा बेलायतीहरूद्वारा लुटिएका विभिन्न सामान फिर्ता लिनका लागि कूटनीतिक अभियान थालेको द टेलिग्राफ पत्रिकाले खबर दिएको छ ।
शीर्ष भारतीय अधिकारीहरूले यसका लागि चासो दिइरहेको पत्रिका लेख्छ । प्रधानमन्त्री नरेन्द्र मोदीको प्राथमिकता सूचीमा पनि यो अभियान रहेको बताइएको छ ।
उपनिवेशकालीन अधिकारीहरूले अनैतिक रूपमा जबर्जस्ती सामानहरू भारतबाट बेलायत पुर्याएको र यो वास्तवमा डकैती नै भएको निष्कर्ष भारतीय अधिकारीहरूले निकालेका छन् । त्यसैले तस् सामान फर्काउनका लागि भारतमा मन्त्रीस्तरीय तथा कूटनीतिक तहमा प्रयास गरिने बताइएको छ ।
लन्डनमा रहेको भारतीय कूटनीतिकर्मीहरूले ती सामान राखिरहेका व्यक्ति तथा संस्थामा औपचारिक निवेदन पेश गर्ने अपेक्षा छ । यस प्रक्रियाको थालनी सन् २०२३ मै गरिनेछ ।
यस अभियानअन्तर्गत १०५ क्यारेटको कोहिनूर हीरा फिर्ता ल्याउन जोड दिइएको छ । कुनै समयमा भारतीय शासकहरूसँग रहेको उक्त हीरा बेलायतले सन् १८४९ मा पञ्जाब प्रान्त लिएपछि हात पारेको थियो । अहिले त्यो हीरा बेलायतकी दिवंगत महारानी एलिजाबेथ द्वितीयाको मुकुटमा राखिएको छ ।
हालै राजा चार्ल्स तृतीयको राज्याभिषेक समारोहमा उक्त मुकुट र हीरा उपयोग गरिएको थिएन । उक्त हीरा उपयोग गरिएमा उपनिवेशी विगतको दुःखद स्मरण बल्झिने भनी भारतको सत्तारूढ दलले चेतावनी दिएपछि त्यसलाई उपयोग नगरिएको हो ।
