एक भिक्षुणी (साध्वी)लाई बलात्कार गरेको अभियोगमा जेल सजाय पाएका भारतीय ‘धर्म गुरु’ भनिने डेरा सच्चा सौदाका प्रमुख गुरमित राम रहीमकी कथित छोरी तथा सहयोगी हनिप्रीत भारतबाट भागेर नेपाल आएको आशंका गरिएको छ ।

बलात्कारको अभियोगमा दोषी पाइएका राम रहीमलाई अदालतबाटै भगाउने षड्यन्त्र गरेको भन्दै भारतीय प्रहरीले हनिप्रीतविरुद्ध लुकआउट नोटिस जारी गरिसकेको छ । र प्रहरीले अहिले उनको खोजी तीब्र पारेको छ ।

हनिप्रीतको खोजीका लागि भारतीय राज्य हरियाणाको प्रहरी टोली नेपालसँग जोडिएका भारतीय शहरमा सक्रिय भएको छ । हनिप्रीत नेपाल आएको भन्दै नेपाली नाकामा खोजी भइरहेको भारतीय सञ्चारमाध्यमले जनाएका छन् ।

हनिप्रीतको खोजीका लागि हरियाणा प्रहरीका एसपी घनश्याम चैरसियासहितको टोली भारतीय राज्य उत्तर प्रदेशको लाखीमपुर खिरी पुगेको छ । लाखीमपुर खिरी पश्चिम नेपालसँग सीमा जोडिएको भारतीय जिल्ला हो ।

हरियाणा प्रहरीले विगत एक सातादेखि नेपालका पश्चिमी जिल्लासँग सीमा जोडिएका भारतीय नाकामा खोजी तीब्र पारेको छ ।

हरियाणा प्रहरीले कैलालीसँग सीमा जोडिएको भारतीय नाका गौरीफन्टा र कञ्चनपुरसँग सीमा जोडिएको बनबासा, टनकपुर क्षेत्रमा हनिप्रीतको खोजी गरेको थियो । सो क्षेत्रबाट हनिप्रीत नेपाल भागेकोबारे पर्याप्त सूचना नमिलेको एसपी चौरसीयाले बताए ।