लोकप्रिय हास्य कलाकार मरिचमान श्रेष्ठ ‘बल्छी धुर्वे’ले फिल्म निर्माणको तयारी थालेका छन् ।

उनले सामाजिक कथावस्तुमा आधारित फिल्म निर्माण गर्ने तयारी गरेको जानकारी दिए । ‘अहिले कथामा काम गरिरहेको छु । सामाजिक विषयवस्तुमा फिल्म बनाउने तयारी हो’ उनले भने ‘समाजमा भएको घटनालाई जस्ताको त्यस्तै  देखाउने प्रयास रहनेछ । अबको एक वर्षभित्रमा फ्लोरमा लैजाने योजना छ ।’

फिल्म उनको एकल लगानीमा बन्न लागेको भने होइन । शेयरमा काम गर्ने टिम भए लगानीमा सहज हुने मरिचमान बताउँछन् । 

निर्देशन कसले गर्ने तय गरिसकेका छैनन् । यद्यपि, आफूले लेखेको कथा भएकाले निर्देशन आफैले गर्ने खोँच उनको छ । 

‘एकजनाले लेखेको कथा, अर्कोले निर्देशन गर्दा पर्दामा जीवन्त नउत्रिन पनि सक्छ । त्यसैले पनि आफैले निर्देशन गर्ने सोँच बनाएको हुँ’ उनले सुनाए । 

फिल्ममा लिड भूमिकामा आफू नदेखिने उनले बताए ।  

उनले भने, ‘लिडमा म होइन, म भन्दा अग्रज दाई–दिदीहरू हुनुहुनेछ । सहायक रोलमा भने अवश्य पनि देखिनेछु ।’

फिल्म निर्माणमा लागेपनि सिरियललाई पनि उनले निरन्तरता दिनेछन् । 

यतिबेला मरिचमान टेलिसिरियल ‘हल्का रमाइलो’ र ‘जुठे’मा देखिँदै आएका छन् । दुवै टेलिसिरियल दर्शकमाझ निकै लोकप्रिय छन् ।