सरकारले औषधिजन्य प्रयोगका लागि आगामी आर्थिक वर्षमा गाँजा खेतीको सम्भाव्यता अध्ययन गर्ने घोषणा गरेको छ ।

संघीय संसद्को बैठकमा आर्थिक वर्ष २०८०/०८१ को बजेट पेश गर्दै अर्थमन्त्री डा. प्रकाशशरण महतले गाँजा खेतीको सम्भाव्यता अध्ययन गर्ने घोषणा गरेका हुन् ।

नेपालमा प्रतिबन्धित गाँजा खेतीलाई वैधानीकरण गर्न संसद्मा आवाज उठ्दै आएको थियो ।

यसअघिको प्रतिनिधिसभामा गैरसरकारी विधेयक नै पेश भएको थियो ।

अर्थमन्त्रीले गाँजा खेतीको सम्भाव्यता अध्ययनको कुरा गर्दा सांसदले टेबल ठटाएर समर्थन गरेका थिए । 

त्यसपछि संसद्को रोस्ट्रममा उभिएका अर्थमन्त्री हाँसे । अर्थमन्त्री हाँसेपछि सांसदहरू पनि गलल्ल हाँसेका थिए ।