काठमाडौं, २५ भदौ— गृहमन्त्री जनार्दन शर्मा ‘प्रभाकर’ले प्रदेश नम्बर २ मा भयरहित तवरले चुनाव सम्पन्न गर्न सबै सुरक्षा व्यवस्था मिलाइसकेको बताउनु भएको छ । विगतको जस्तो बुथ कब्जा गरेर चुनाव जित्ने सपना नदेख्न पनि उहाँले चेतावनी दिनुभयो ।
सर्लाहीको बलरा नगरपालिका–८ गडहियामा आइतबार आयोजित चुनावी सभालाई सम्बोधन गर्दै मन्त्री शर्माले भन्नुभयो, ‘विगतको जस्तो मतपेटिका लुटेर जित्ने सपना देखेको भए त्यो सपना बिफल हुनेछ । बुथ कब्जा गर्न खोज्नेलाई नै सुरक्षा निकायले कब्जा गर्नेछन् ।’
मन्त्री शर्माले निर्वाचनमा निर्धक्क भएर स्वस्थ प्रतिस्पर्धा गर्न सबैलाई आग्रह गर्नुभयो । निर्वाचनलाई मर्यादित, शान्तिपूर्ण र धाँधलीरहित बनाउन सबै तयारी पूरा गरेको जानकारी पनि दिँदै गृहमन्त्री शर्माले भन्नुभयो, ‘शान्ति सुरक्षा व्यवस्थित र मजबुत गरिएको छ । चुनाव शान्तिपूर्ण हुन्छ ।’
