सरकारले संसद्‌मा पेस गरेको आगामी आर्थिक वर्ष २०८०/०८१ को बजेट पारितका पक्षमा मतदान गर्ने कि नगर्ने भन्ने विषयमा निर्णय गर्न सत्ता गठबन्धनमा रहेका तीन दलको छुट्टाछुट्टै बैठक बस्दै छन् । जनता समाजवादी पार्टी (जसपा) नेपाल, नेकपा एकीकृत समाजवादी र जनमत पार्टीले बजेटबारे आज निर्णय गर्ने भएका हुन् । 

जसपा संसदीय दलको बैठक बुधवार (आज) बिहान १० बजे दल बस्दै छ । 

यस्तै जनमत पार्टीको संसदीय दलको बैठक पनि आजै बस्दै छ ।  जनमतले बैठक बसेर बजेटबारे निर्णय गर्ने छ । 

यस्तै बजेटप्रति असन्तुष्ट सत्ता गठबन्धनकै दल नेकपा एकीकृत समाजवादीले बजेट पारितका पक्षमा मत दिने वा विपक्षमा भन्ने विषयमा निर्णय गर्न आजै बैठक बस्दै छ । एकीकृत समाजवादीको बैठक बिहान साढे १० बजे बस्ने तय भएको छ । 

सत्तारूढ नेपाली कांग्रेस र नेकपा माओवादी केन्द्रले भने बजेटका पक्षमा मतदान गर्न यसअघि नै ह्वीप जारी गरिसकेका छन् । 

सरकारले आजै बस्ने प्रतिनिधि सभाको बैठकमा बजेट पारितको प्रक्रिया अघि बढाउने तयारी गरेको छ।