कोशी प्रदेशका मुख्यमन्त्री रहेका नेकपा एमाले संसदीय दलका नेता हिक्मतकुमार कार्कीले आफूले विश्वासको मत नपाए मुलुक मध्यावधिमा जाने दाबी गरेका छन् । बिहीवार प्रदेशसभामा विश्वासको मत माग्दै कार्कीले आफूले विश्वासको मत नपाए प्रदेशसभाबाट नयाँ सरकार बन्न नसक्ने दाबी गरेका हुन् । 

सरकार समर्थित दलले समर्थन फिर्ता लिएपछि मुख्यमन्त्री कार्कीले दोस्रोपटक विश्वासको मत लिन लागेका हुन् । 

माओवादी केन्द्रको समर्थनमा कार्की मुख्यमन्त्री बनेका थिए । केन्द्रमा समीकरण फेरिएसँगै प्रदेश सरकार अप्ठ्यारोमा परेको थियो । 

मुख्यमन्त्री कार्कीले आफू नेतृत्वको सरकारले संघीयताको औचित्य पुष्टि हुनेगरी काम गरिरहेको दाबी गरे । विश्वासको मतमाथिको छलफलमा माओवादी केन्द्रका इन्द्र आङवोले अहिलेको अवस्थामा विश्वासको मत दिन नसकिने बताए । 

नेकपा एकीकृत समाजवादीका राजेन्द्र राईले विश्वासको मत नदिने बताए । 

छलफल सकिएपछि प्रदेशमा आजै मतविभाजन हुँदैछ । मुख्यमन्त्री कार्कीलाई विश्वासको मतका लागि राप्रपा बाहेक अन्य एक जना सांसदको समर्थन जरुरी छ ।

४७ सांसदको समर्थन चाहिनेमा एमालेसँग ४० र राप्रपाका ६ सांसद छन् । विश्वासको मतका लागि कार्कीले एक सांसदलाई फ्लोर क्रस गराउनु पर्ने अवस्था छ ।