१५ असार २०८३, सोमबार
बम पड्काउँदै फिरौती रकम माग गर्ने गिरोहका तीन जनालाई रुपन्देही प्रहरीले पक्राउ गरेर सार्वजनिक गरेको छ ।
पक्राउ पर्नेमा रुपन्देहीको सियारी गाउँपालिका–४ का २७ वर्षीय अब्दुल हाकिम खान, रुपन्देहीको कोटहीमाई–३ पर्सियाका वर्ष २२ का सुरज लोहार र कोटहीमाई–४ का सुरज थारू रहेका छन् । उनीहरूलाई रुपन्देही प्रहरीले बिहीवार पत्रकार सम्मेलन गरी सार्वजनिक गरेको हो ।
उनीहरूलाई रुपन्देहीको विभिन्न स्थानबाट पक्राउ गरिएको जिल्ला प्रहरी कार्यालय रुपन्देहीका प्रमुख प्रहरी उपरीक्षक भरतबहादुर विकले जानकारी दिए । उनीहरू तीनै जना रुपन्देहीका विभिन्न स्थानमा बम पड्काउने र फिरौती रकम माग गर्ने अपराधिक कार्यमा संलग्न भएको प्रहरीको दाबी छ ।
गत मंगलवार पक्राउ परेका उनीहरूलाई अदालतबाट म्याद थप गरी अनुसन्धान गरिएको प्रहरीले जनाएको छ । घटनामा अन्य व्यक्तिहरू पनि संलग्न रहेको आशंका प्रहरीको छ।
प्रहरीका अनुसार उनीहरूले गत वैशाख १ गते सियारी गाउँपालिकाका अध्यक्ष थानेश्वर घिमिरेको घरलाई लक्षित गरी पर्खालमा प्रेसर कुकर बम राखेका थिए । उक्त बम स्थानीयको सूचनालगत्तै नेपाली सेनाको टोलीले डिस्पिोज गरेको थियो ।
यस्तै असार १ गते व्यवसायी भैरवप्रसाद कलवारको सिद्धार्थनगर–४ मा रहेको दाना फ्याक्ट्री गोदामको पर्खाल बाहिर प्रेसर कुकर बम विस्फोट गराएका थिए ।
व्यक्तिसँग फिरौती माग गर्ने र तर्साउने उद्देश्यले सिटी हस्पिटल भैरहवा नजिकै सडकमा समेत बम विस्फोट गराएको र यी सबै घटनामा तीनै जनाको सम्लग्नता रहेको तथ्य फेला पारेको प्रहरीको भनाइ छ ।
उनीहरूबाट दुई थान मोटरसाइकल र पाँच थान मोबाइलसमेत प्रहरीले बरामद गरेको जनाएको छ ।
