०२ असार २०८३, मंगलबार
२५ लाख बढीको औषधिसहित सशस्त्र प्रहरीले एक जनालाई पक्राउ गरेको छ । धनुषाको जनकपुर उपमहानगरपालिका-१२ बर्हविगहाबाट मंगलवार साँझ करिब २५ लाख २० हजार बराबरको डेन्टल औषधि बोकेको कारसहित एक जना भारतीयलाई नियन्त्रणमा लिइएको हो ।
पक्राउ पर्नेमा भारत घर बताउने २९ वर्षीय मो ईक्वाल रहेको सशस्त्र प्रहरीका सह प्रवक्ता शैलेन्द्र थापाले जानकारी दिए । उनका अनुसार बी.आर ३२ एक्यू १२०२ नम्बरको कारमा राखी भारतबाट नेपालतर्फ ल्याउँदै गरेको औषधीसहित उनलाई राजश्व भन्सार सुरक्षा वेश जनकपुरधामले नियन्त्रणमा लिएको हो ।
औषधि तथा कारसहित उनलाई आवश्यक कारवाहीको लागि राजश्व भन्सार कार्यालय जनकपुरधाम धनुषामा बुझाइएको उनले बताए ।
