राष्ट्रिय प्रजातन्त्र पार्टी, नेपालका अध्यक्ष कमल थापाले पार्टीले राजसंस्थाको विषयमा लिएको नीतिमा पुनर्विचार गर्ने बताएका छन् । आज (बुधवार) पार्टी आवद्ध जनवर्गीय संगठनको संयुक्त भेलालाई सम्बोधन गर्दै थापाले देशभरीका कार्यकर्ताको भावनाको सम्मान गर्दै राजसंस्थाको विषयमा लिइएको नीतिमा पुनर्विचार गरिने थापाले स्पष्ट पारे।

मुलुकको भूराजनीतिक अवस्थालाई दृष्टिगत गर्दै राजसंस्थाको औचित्य र आवश्यकता हुँदाहुँदै पनि पार्टीले तत्काल कार्यनीतिमा नराखेको अवस्थामा केन्द्रीय समिति बैठकमा व्यक्त धारणा र कार्यकर्ताको नीतिमा पुनर्विचार गरिने बताए ।

कांग्रेस-कम्युनिस्ट प्रति जनताको चरम वितृष्णा रहेको र नयाँ शक्तिको रूपमा आएका पार्टीहरू सत्ता केन्द्रित भएको अवस्थामा २०८४ को निर्वाचनमा नयाँ शक्ति जनताको रोजाई हुनेसमेत थापाले भविस्यवाणी गरे ।

थापाले त्यो नयाँ शक्ति राप्रपा नेपाललाई बनाउन केन्द्रित हुन सबै जनवर्गीय संगठनहरुलाई निर्देशन दिए । आगामी दिनमा राप्रपा नेपाललाई एउटा शक्तिशाली वैकल्पिक शक्ति बनाएरै छाड्ने थापाले दृढता व्यक्त गरे ।