०८ साउन २०८३, शुक्रबार
भारतको राजस्थानमा एक महिलाले रेलमुनि कुदेर आत्महत्या गरेकी छन् । राजस्थानको जोधपुर जिल्लाको मथानिया कस्बा भन्ने ठाउँमा एक महिलाले चल्दै गरेको रेलमुनि कुदर आत्महत्या गरेकी हुने । भारतीय सञ्चार माध्यमहरूका अनुसार बिरमा देवी नामकी ती महिलाले आफूसँगै आफ्ना दुई सन्तानको पनि हत्या गरेकी छन् ।
उनले आत्महत्या गर्नुको कारण भने अनौठो छ । घटना जुलाई २ को हो । जुन दिन उनका श्रीमान सुरेशको जन्म दिन थियो । सुरेश ट्याक्सी चालक हुन् । श्रीमती बिरमा देवी गाउँमै बस्दै आएकी थिइन् भने उनका श्रीमान सुरेश शहरमा बसेर ट्याक्सी चलाउँथे ।
भारतीय सञ्चार माध्यम आजतकका अनुसार जन्म दिनको अघिल्लो दिन फोन गर्दा पनि नउठेपछि उनी बर्थ डे सरप्राइज दिन भन्दै दुई छोरलाई लिएर पतिको डेरामा पुगिन् ।
तर, त्यहाँ पुग्दा उनले सहनै नसक्ने दृष्य देखिन् । पति अर्की कोही महिलासँग जन्म दिन मनाइरहेका थिए । खासमा उनका श्रीमान अर्कै एक महिलासँग लिभिङ टुगेदरमा बसिरहेका रहेछन् । उनी केहीबेर दुवैलाई गाली गरेर रुँदै बाहिरिएकी थिइन् ।
श्रीमानलाई जन्म दिनको शुभकामना दिन गएकी ती महिलाले त्यो सहन गर्नै सकिनन् सायद ।
समाचारमा जनाइएअनुसार उनी त्यहाँबाट निस्केर सिधै रेलमुनि गइन् । चल्दै गरेको रेलमुनि पसेर आफू र आफ्ना दुई छोराको पनि ज्यान लिएको आजतकले जनाएको छ ।
