२२ जेठ २०८३, शुक्रबार
कास्की जिल्लाको मादी गाउँपालिकामा अबिरल वर्षापछिको पहिरोले घरमा क्षति पुगेर विस्थापित परिवारलाई राहत प्रदान गरिएको छ ।
मादीको वडा नम्बर ६ का ५ र वडा नम्बर २ का १ परिवारमध्ये २ घर पूर्णरूपमा विस्थापित र अन्य जोखिममा परेका थिए । मादी गाउँपालिका र जिल्ला प्रशासन कार्यालयले शनिवार प्रभावित परिवारलाई गाउँमै पुगेर राहत रकम प्रदान गरेका हुन् । पीडित परिवारलाई क्षतिका आधारमा गाउँपालिकाले २ लाख ५ हजार र जिल्ला प्रशासनले १ लाख राहत वितरण गरेको छ ।
असार १९ गतेको अबिरल वर्षाले मादी–६ को काहुँखोला–दूधपोखरी सडकको दोस्रो खण्डमा सजुक भेडीखर्क टोलको भेडीखर्क चोकमा ५ परिवारका ६ घर र गोठ पहिरोले क्षति पुर्याएको थियो । पहिरोबाट विस्थापित मादी–६ का कमलापति बराललाई मादी गाउँपालिकाबाट ७० हजार र प्रशासनबाट २५ हजार राहत रकम प्रदान गरिएको छ ।
दीपक बराललाई गाउँपालिकाबाट ५० हजार र प्रशासनबाट २० हजार, शम्मेर पाण्डेलाई पालिकाबाट ३० हजार र प्रशासनबाट १५ हजार, भुवन सिंहलाई पालिकाबाट २० हजार र प्रशासनबाट १५ हजार राहत रकम प्रदान गरिएको छ । पहिरो पीडित विष्णुमाया घर्तीका परिवारलाई प्रशासनबाट १५ हजार र गाउँपालिकाबाट २० हजार र कृष्णप्रसाद देवकोटाका परिवारलाई गाउँपालिकाबाट १५ हजार प्रशासनबाट १० हजार राहत रकम प्रदान गरिएको मादी गाउँपालिका–६ का वडाध्यक्ष डिलबहादुर क्षेत्रीले जानकारी दिए ।
