संघीय संसद्मा जारी अवरोध हटाउने विषयमा प्रमुख तीन दलका शीर्ष नेताहरूले आज पनि छलफल गर्ने भएका छन् ।

प्रधानमन्त्री पुष्पकमल दाहाल ‘प्रचण्ड’को आह्वानमा तीन दलका नेताको छलफल हुन लागेको हो ।

प्रधानमन्त्री कार्यालय सिंहदरबारमा दिउँसो साढे १ बजे प्रचण्डले नेकपा एमालेका अध्यक्ष केपी शर्मा ओली र कांग्रेस सभापति शेरबहादुर देउवासँग छलफल गर्न लगेका हुन् ।

प्रमुख प्रतिपक्षी दलका नेतासँग केहीबेरमा छलफल हुने प्रधानमन्त्रीको सचिवालयले जानकारी दियो । 

आइतवार बिहान भएको छलफलमा प्रधानमन्त्रीले सम्बोधन गरेर संसद् चल्न दिने समझदारी एमालेले गरेको थियो ।

तर, प्रधानमन्त्री प्रचण्डको सचिवालयले जारी गरेको विज्ञप्ति फिर्ता गर्नुपर्ने एमालेको अडानका कारण अन्तिम सहमति जुट्न सकेको थिएन । 

सहमतिको प्रयास भइरहेको भन्दै प्रधानमन्त्री प्रचण्डले बैठक स्थगित गर्न आग्रह गरेपछि प्रतिनिधिसभाको बैठक बस्दै नबसी सूचनामार्फत सोमवार दिउँसो ३ बजेका लागि सारिएको थियो । 

आफूलाई प्रधानमन्त्री बनाउन प्रितम सिंह पटक–पटक दिल्ली धाएको भन्ने प्रचण्डको अभिव्यक्तिलाई लिएर एमालेले असार २० गतेदेखि संसद् अवरुद्ध गर्दै आएको छ ।