०४ साउन २०८३, सोमबार
एसीसी इमर्जिङ टिम्स एशिया कप क्रिकेट प्रतियोगितामा नेपालले पाकिस्तान 'ए' लाई १८० रनको लक्ष्य दिएको छ । टस जितेर ब्याटिङ रोजेको नेपाल ३७ ओभरमा १७९ रन बनाउँदै अल आउट भएको हो ।
पाकिस्तानी बलरसामु नेपाली ब्याट्स्मेन निरीहजस्तै देखिए ।
नेपालका लागि सोमपाल कामीले सर्वाधिक ७५ रन बनाए । उनले १०१ बलमा ९ चौका र एक छक्का प्रहार गर्दै ७५ रन बनाएका हुन् ।
सोमपालपछि प्रतिश जीसी २६ रन बनाएर आउट भए । उनले २४ बलमा दुई छक्का र एक चौकाको मद्दतमा २६ रन बनाए ।
त्यस्तै नेपालका अर्जुन साउद र कुशल मल्ल समान १७ रनको योगदान गरे । गुल्सन झा १३, आशिफ शेख १२, रोहित पौडेल ४, कुशल भुर्तेल र पवन शर्राफ समान १ रन बनाउँदा भीम सार्की शून्य रनमा आउट भए ।
पाकिस्तानका २२ वर्षीया अलराउन्डर मोहम्मद वासिमले ४ र बलर शहनवाज दहनीले ५ विकेट लिए ।
नेपाल भारत ए, पाकिस्तान ए र यूएई ए रहेको समूहमा छ ।
भारत-पाकिस्तान लगायत टेस्ट राष्ट्रले राष्ट्रिय टिममा स्थान बनाउन नसकेका वैकल्पिक खेलाडी समेटेर 'ए' टिम प्रतियोगितामा सहभागी गराएको छ ।
