३० असार २०८३, मंगलबार
दुबईमा १५ जना नेपालीलाई अलपत्र परेको विषयमा समाचार प्रकाशित भएपछि पीडितलाई ज्यान मार्ने धम्की आएको छ ।
मासिक १ लाख रुपैयाँ तलब आउने गरी पेट्रोल पम्पमा काम लगाउने भन्दै दुबई पुर्याएर १५ जनालाई अलपत्र पार्ने व्यक्तिले पीडितलाई ज्यान मार्ने धम्की दिएका हुन् ।
लोकान्तरसँग सम्पर्कमा रहेका पीडितले समाचारको विषयलाई लिएर आफूहरूलाई ज्यान मार्ने धम्की आएको बताए । ‘सर, हामीलाई मार्छु, दुबईमा मैले के–के गर्न सक्छु हेर, भन्दै धम्की दिएको छ,’ पीडितमध्येका एकजनाले लोकान्तरसँग भने ।
दुबईमा अलपत्र पार्ने मुख्य नाइके दुबईमा सिल्भरलाइन फ्यासिलिटी म्यानेजमेन्ट सर्भिसेज सञ्चालन गर्ने पर्वत डाँडाखर्कका विजय सुनार र उनका सहयोगी झापाको शिवसताक्षी मैहरका ओमप्रकाश भन्ने अनुप थापाले धम्की दिएको पीडितले बताएका हुन् ।
आफूहरू दुबईमा काम गर्दै आएकी एक दिदीको घरमा सेल्टर लिएर बसेको पीडितहरूले बताएका छन् ।
लोकान्तरले बुधवार 'दुबईमा १५ नेपाली अलपत्र, खान/बस्न देऊ भन्दा गुण्डा लगाएर कुटपिट' शीर्षकको समाचार प्रकाशित गरेको थियो ।
