२२ जेठ २०८३, शुक्रबार
अख्तियार दुरुपयोग अनुसन्धान आयोगले मुगुको छायाँनाथ रारा नगरपालिका नगर कार्यपालिका तत्कालीन निमित्त प्रमुख प्रशासकीय अधिकृत ललित जङ्ग मल्लसहित सात जनाविरुद्ध भ्रष्टाचार मुद्दा दायर गरेको छ ।
नगरपालिकाको वडा नम्बर २ मा पार्क निर्माण गर्दा अनियमितता गरेको अभियोगमा उनीहरूविरुद्ध आज (शुक्रवार) विशेष अदालत काठमाडौंमा आरोप-पत्र दायर गरिएको अख्तियारका प्रवकता भोला दाहालले जानकारी दिए ।
उनका अनुसार निमित्त प्रमुख प्रशासकीय अधिकृत मल्लसहित तत्कालीन लेखापाल रुनबहादुर सेजुवाल, कम्प्युटर अपरेटर केशर बहादुर रावल, तत्कालीन इन्जिनियर महेश सिंह कठायत र तत्कालीन असिस्टेन्ट सव-इन्जिनियर हस्तबहादुर मल्लसमेतविरुद्ध भ्रष्टाचार मुद्दा दायर गरिएको हो ।
यस्तै पार्क निर्माण उपभोक्ता समितिका अध्यक्ष विष्णुबहादुर रावल र कोषाध्यक्ष बसन्ती रावलविरुद्ध समेत मुद्दा दायर गरिएको हो ।
उनीहरूले जिल्ला वन कार्यालय कम्पाउण्डभित्रको जग्गामा पार्क निर्माण गर्ने अनुमतिसमेत नलिई डिजाइन, नक्सा र लागत अनुमान तयार गर्न लगाई स्वीकृतगरी उपभोक्ता समितिलाई ३८ लाख ४ हजार ५०० पेश्की उपलब्ध गराएको अभियोग पत्रमा उल्लेख छ ।
तर, जिल्ला वन कार्यालयले अनुमति नदिएकोले सम्झौता बमोजिम पार्क निर्माण हुन नसक्ने अवस्थामा उपभोक्ता समितिलाई भुक्तानी भएको पेश्की फर्छ्यौट हुन नसकेको उनीहरूविरुद्ध भ्रष्टाचार मुद्दा दायर गरिएको अख्तियारले जनाएको छ ।
यस्तै उपभोक्ता समितिका अध्यक्ष र कोषाध्यक्षले काम हुन नसक्ने अवस्थामा बाँकी पेश्की रकम फर्स्यौट गर्नु पर्नेमा नगरी भ्रष्टाचार गरेको अख्तियारको दाबी छ ।
निमित्त प्रमुख प्रशासकीय अधिकृत मल्लसहित तत्कालीन लेखापाल सेजुवाल, कम्प्युटर अपरेटर रावल, तत्कालीन इन्जिनियर सिंह र तत्कालीन असिस्टेन्ट सव-इन्जिनियर मल्लविरुद्ध ३८ लाख ४७ हजार ५०० रकम बिगो कायम गरी मुद्दा दायर गरिएको अख्तियारले जनाएको छ ।
यस्तै उपभोक्ता समितिका अध्यक्ष विष्णुबहादुर रावल र कोषाध्यक्ष बसन्ती रावलविरुद्ध ३३ लाख ८२ हजार ४१७ रुपैयाँ बिगो कायमगरी मुद्दा दायर गरिएको अख्तियारले जनाएको छ ।
