काठमाडौं महानगरपालिकाले पोलिथिनको मोटाइ मापनका लागि अनुगमन गर्ने भएको छ । महानगरमा प्लाष्टिक निषेध कार्यक्रम कार्यान्वयनका लागि माइक्रोमिटरबाट पोलिथिनको मोटाइ नापेर अनुगमन गरिने मेयर बालेन शाहले जानकारी दिएका छन् ।

महानगरका लागिभन्दा पनि महानगरवासी, वातावरण, जीव जनावरको बचावटका लागि अनुगमन गरिने मेयर शाहले बताएका छन् । ‘प्लाष्टिकले हामीलाई कति हानी गरिरहेको छ भन्ने कुरा महसुस हुन सकेको छैन । तर अध्ययनअनुसार नवजात शिशुको सालनालमा माइक्रो प्लाष्टिक पाइएको छ’ उनले लेखेका छन् । साथै उनले जनावरको दिशामा पनि प्लाष्टिक पाइएको बताएका छन् ।

‘शहरको सभ्यताका बिम्ब बागमती, विष्णुमती, मनोहरा, धोवीखोला, टुकुचालगायतका नदी, राजकुलाहरू र खुल्ला स्थानहरूमा प्लाष्टिक फ्यालिएका कारण प्रदूषित बनेका छन् । सामुदायिक चौपायाले खानेकुरासँगै प्लाष्टिक खाँदा पशु स्वास्थ्यमा पनि गम्भीर आघात परेको छ’ उनले लेखेका छन् ।