३१ जेठ २०८३, आइतबार
जोडी बाँधेर कलाकारितालाई अगाडि बढाउने चलन नेपाल टेलिभिजनको स्थापना हुनुभन्दा धेरै वर्ष पहिलेबाटै शुरू भएको थियो । हास्य–व्यंग्य प्रस्तुत गर्ने कलाकारहरू रंगमञ्चमार्फत् दर्शकमाझ लोकप्रिय भइसकेका थिए ।
पुराना कलाकारहरूका अनुसार जोडी बनाएर हास्यव्यंग्य प्रहसन गर्नेको पहिलो पुस्तामा राजपाल थापा र ध्रुवरत्न हाडा (हाडापाल) लगायतको जोडीको नाम आउँछ ।
२०२० को दशकबाट जोडी बनाएर हास्य व्यंग्य प्रहसन गर्ने हाडापाल जोडीको प्रस्तुति त्यतिबेला दर्शकले निकै मन पराउने गरेको जानकारहरू स्मरण गर्छन् ।
त्यसबेला भीमबहादुर थापा र हेमजंग पाण्डेले पनि (थापा र पाण्डे) जोडी बनाएर हास्य व्यंग्य प्रस्तुत गरेको जानकारहरू बताउँछन् । त्यो समयदेखि यो समयसम्म आउँदा हास्य व्यंग्यको क्षेत्रमा थुप्रै कलाकारहरूले जोडी बनेर सहकार्य गरे । दर्शकको मन जिते । तीमध्ये धेरै जोडीहरू केही वर्षमै छुट्टिन पुगे । केही जोडीहरू भने नछुट्टिएर निरन्तर सँगसँगै अगाडि बढिरहे ।
मदनकृष्ण श्रेष्ठ र हरिवंश आचार्य (मह ) जोडी
हास्य जोडी भन्नेबित्तिकै मदनकृष्ण श्रेष्ठ र हरिवंश आचार्य (मह) को नाम अग्रपंक्तिमा आउँछ । मह जोडीलाई नेपाली कलाकारिता क्षेत्रको सबैभन्दा चर्चित जोडीका रूपमा पनि लिइन्छ ।
विक्रम संवत् २०३८ सालमा बैंकेश्वर शीर्षकको प्रहसनबाट सहकार्य गर्दै आएका मदनकृष्ण र हरिवंश हास्य व्यंग्य क्षेत्रमा अहिलेसम्मकै सबैभन्दा लामो समयसम्म सहकार्य गर्ने जोडी हो । उनीहरूले देश–विदेशका स्टेज कार्यक्रमदेखि टेलिफिल्म, म्युजिक भिडियो, विज्ञापन, फिल्ममा समेत सहकार्य गरेका छन् । विभिन्न कार्यक्रमहरूमा समेत मह जोडीलाई सँगै देख्न पाइन्छ ।
दीपकराज गिरी र दीपाश्री निरौलाको जोडी
अभिनेता एवं निर्माता दीपकराज गिरी र अभिनेत्री एवं निर्देशक दीपाश्री निरौलाको जोडी पनि कलाकारितामा लामो समयदेखि जमिरहेको जोडी हो । यी दुवैले ३ दशकभन्दा लामो सहकार्य गरिसकेका छन् ।
रेडियो कार्यक्रम ‘रामविलास र धनियाँ’मार्फत जोडी भएर उनीहरूले स्रोताको मन जितेका थिए । ‘तीतो सत्य’मार्फत उनीहरूको जोडी अझ फस्टाउन पुगेको थियो । उनीहरू एक समय स्टेज कार्यक्रममा निकै खोजिने कलाकारमा पर्दथे । पछि यी दुवैले अन्य कलाकारहरूलाई पनि जोडेर फिल्म निर्माणमा हात हाले । एकपछि अर्को फिल्मबाट सफलता पनि पाइरहेका छन् ।
गत वर्ष मात्रै उनीहरूको फिल्म ‘छक्का पञ्जा ४’ प्रदर्शनमा आएको थियो । भदौबाट त उनीहरूले फिल्म हल समेत सञ्चालनमा ल्याउँदैछन् ।
धुर्मुस–सुन्तली : रिलको मात्र होइन, रियलकै जोडी
‘मेरी बास्सै’मा सँगै काम गरेका सिताराम कट्टेल ‘धुर्मुस’ र कुञ्जना घिमिरे ‘सुन्तली’को जोडी घरकै जोडी बन्न पुगे । यो जोडीले देशदेखि विदेशका थुप्रै स्टेज कार्यक्रममा पुगेर दर्शकलाई हँसाए, कलाकारिताबाट लोभलाग्दो फ्यान फ्लोइङ कमाए ।
२०७२ सालमा नेपालमा भूकम्प गएपछि उनीहरू सिरियल छाडेर सामाजिक काममा सक्रिय हुन पुगे ।
केही वर्ष सामाजिक काममा लागेका उनीहरू फेरि सक्रिय कलाकारितामा फर्किने तयारी गर्दैछन् । २ महिना अगाडि मात्रै उनीहरूले वेब फिल्म ‘म त मर्छु कि क्या हो’ सार्वजनिक गरेका थिए । वेब फिल्मले दर्शकबाट राम्रो प्रतिक्रिया बटुलिरहेको छ ।
धेरैले ‘धुर्मुस सुन्तली’लाई सक्रिय कलाकारितामा फर्किएको हेर्न चाहेको समेत बताएका छन् । यो जोडीले चाँडै नै सक्रिय कलाकारितामा फर्किने तयारी गरेको छ ।
शिवशंकर रिजाल ‘जोगिन्दर पानवाला’ र सुरेन्द्र केसी ‘मुलासाग’
गाईजात्रे प्रहसनका लागि शिवशंकर रिजाल ‘जोगिन्दर पानवाला’ र सुरेन्द्र केसी ‘मुलासाग’ले बाँधेको जोडी पनि राम्रै जम्न पुग्यो ।
एक समय यो जोडी देशदेखि विदेशका स्टेज कार्यक्रममा निकै व्यस्त रह्यो । पछिल्ला वर्षमा भने उनीहरू स्टेजमा अलि कम देखिन्छन् । यद्यपि यो जोडी अहिलेसम्म छुट्टिएको भने छैन ।
शिवशंकरका अनुसार उनीहरूको जोडी आउँदो दशैंमा स्टेज प्रस्तुतिका लागि इजरायल जाँदैछ ।
अर्जुन घिमिरे ‘पाँडे’ र कुमार कट्टेल ‘जिग्री’
‘भद्रगोल’मार्फत दर्शकको प्रिय बनेका अर्जुन घिमिरे ‘पाँडे’ र कुमार कट्टेल ‘जिग्री’ जोडीका रूपमा एक समय स्टेज कार्यक्रममा निकै व्यस्त बने । देशदेखि विदेशसम्म पुगेर दर्शकलाई मनोरञ्जन दिए ।
पछिल्ला वर्ष स्टेजतिर कमै हिँड्ने उनीहरू ‘सक्किगोनि’ सिरियलमार्फत भने दर्शकलाई हँसाइरहेका छन् । यी दुवैले संयुक्त रूपमा सिरियलको लेखन एवं निर्देशन गर्दै आएका छन् ।
‘भद्रगोल’बाटै सागर लम्साल ‘बले’ र हरिश निरौला ‘कक्रोच’लाई पनि दर्शकले जोडीका रूपमा माया गरे । उनीहरू स्टेज कार्यक्रममा जोडी बनेर बाक्लै हिँडे । 
स्टेज कार्यक्रम मात्र होइन, म्युजिक भिडियोमा पनि एक समय यो जोडी निकै व्यस्त रह्यो ।
‘गाह्रो छ हो’ सिरियलमा बेगम नेपाली ‘भटभटे माइला’ र रियाशा दाहाल ‘पुलती’को जोडी जमिरहेको छ । उनीहरू केही समय अघिसम्म स्टेज कार्यक्रममा पनि जोडीका रूपमा पुग्ने गरेका थिए । बेगम र रियाशाले म्युजिक भिडियोमा समेत सहकार्य गरेका छन् । अन्य केही कलाकारहरू समेत जोडी बनाएर कलाकारितामा सक्रिय छन् ।
