२४ जेठ २०८३, आइतबार
नेपाल नागरिक उड्डयन प्राधिकरण (क्यान)ले हिमाली तथा दुर्गम पहाडी क्षेत्रमा दिउँसो १२ बजेपछिको उडानमा रोक लगाएको छ ।
हवाई क्षेत्रको नियामक निकाय क्यानले मनसुनको समयमा हवाई यात्रामा हुनसक्ने सम्भावित जोखिम न्यूनीकरण गर्न लगाएको यस्तो प्रतिबन्ध लगाएको हो । तर मौसमको अनुकूलतामा हुने उद्धार उडानमा भने लागु नहुने प्राधिकरणले स्पष्ट पारेको छ ।
प्राधिकरणले आइतवार प्रत्रकार सम्मेलन गरेर सम्बन्धित विमानस्थलको सञ्चालन समयभित्र मौसमी अनुकूलतामा नियमित उडान सञ्चालन हुने बताएको छ ।
मौसमको अनुकूलतामा अत्यावस्यक, उद्धार, विशेष प्रकारको जहाजको उडान तथा हेलिकप्टरको उडानमा कुनै रोक तथा प्रतिबन्ध नलगाइएको प्राधिकरणले स्पष्ट पारेको छ ।
प्राधिकरणले भने यात्रुको सुरक्षालाई ध्यानमा राखेर नियमित उडानका तथा चार्टर उडानका वायुसेवाको हकमा तोकिएको उडान समय भित्रै उडान गर्नुपर्ने व्यवस्था गरेको बताएको छ । प्राधिकरणले उडान हुने विमानस्थल, इनरुट र गन्तव्य विमानस्थलको मौसम सफा रहेको अवस्थामा भने कुनै पनि उद्धार उडानलाई कुनै पनि बेला रोक नलगाएको स्पष्ट पारेको छ ।
आइतवारको पत्रकार सम्मेलनमा प्राधिकरणका महानिर्देशक प्रदीप अधिकारीले नेपालमा भएका अधिकांश दुर्घटना पर्यटन व्यवसायी, पाइलट, प्राविधिकले उडान नियमलाई राम्रोसँग पालना नगर्दा हुने गरेको बताए । उनले हवाई सञ्चालकले ‘चान्स’ मार्ने नियति रहेकाले पनि दुर्घटना बढिरहेको बताए ।
प्राधिकरणले हिमाली क्षेत्रमा १२ बजेपछि उडान अनुमति बन्द गरेमा निजी क्षेत्रका हवाई सेवा सञ्चालकहरूले भने विरोध गरेका छन् । व्यवसायीको विरोध भए पनि क्यानले भने व्यवसायीहरूले नियमलाई अटेरी गरेका कारण बाध्य भएर १२ बजे पछाडि उडान अनुमति रोकेको बताएको छ ।
‘हवाई उडानको नियममा बादल भित्र जहाज जान पाउँदैन । तर यहाँ नियमलाई व्यवसायीले पालन गरेका छैनन्,’ महानिर्देशक अधिकारीले भने – ‘नियम कार्यान्वयन नभएपछि हामीले बाध्य भएर १२ बजेपछिको उडान अनुमति नदिने निर्णय गरेका हौं ।’
यो नियम वर्षाको समयमा मात्रै रहने पनि अधिकारीले बताए । अधिकारी भन्छन्, ‘अहिले पर्यटन सिजन पनि हैन, त्यस्तो आपत पनि केही पर्दैन । हामीले हवाई सुरक्षाका लागि पवित्र काम गरेका हौं ।’ उनी थप्छन्, ‘तर मौसम ठीक छ भने हामी जुन बेला नि अनुमति दिन तयार छौं ।’
