१३ असार २०८३, शनिबार
मोरङको सुन्दरहरैँचा नगरपालिका १२ मा भारतीय नागरिकको रहस्यमय मृत्यु भएको छ । भारत उत्तर प्रदेश घर भएका २४ वर्षीय साजिक खानको मृत्यु रहस्यमय बनेको हो ।
खानको शव पैनीमा डुबिरहेको अवस्थामा आइतवार दिउँसो साढे १२ बजेतिर फेला परेको थियो । शवको प्रकृति हेर्दा हत्या भएको हुनसक्ने प्रहरीको प्रारम्भिक अनुमान छ ।
खानको निधार, मुखलगायत शरीरका विभिन्न भागमा चोट लागेको र शव पोस्टमार्टमका लागि बिपी कोइराला स्वास्थ्य विज्ञान प्रतिष्ठान धरान पठाइएको प्रहरीले जनाएको छ ।
खान इटहरीमा एक उद्योगमा भाँडा वर्तन बनाउने काम गर्थे । घटना शंकास्पद देखिएकाले अनुसन्धान अघि बढाइएको मोरङ प्रहरी प्रमुख एसपी दीपक पोखरेलले बताए । ‘घटना शंकास्पद देखिएको छ,’ उनले भने, ‘अहिले अनुसन्धान शुरु भएको छ ।’ घटनाको विस्तृत विवरण भने अनुसन्धानपछि मात्रै खुल्ने उनले बताए ।
प्रहरीको अनुसार खान चार जना साथीसँग शनिवार सुन्दरहरैँचा आएको बुझिएको छ । उनको साथी पनि उनीजस्तै भाँडा वर्तन बनाउने काम गर्दै आएका थिए । प्रहरीले मृतक खानको साथीलाई नियन्त्रणमा लिएको छ ।
उनको साथीलाई नियन्त्रणमा लिएर अहिले अनुसन्धान शुरु गरेको एसपी पोखरेलले बताए । ‘खानसँग आएका दुई जना साथी सम्पर्कविहीन छन्,’ उनले भने, ‘अन्य दुई जना साथीको पनि खोजी भइरहेको छ ।’ प्रहरीले पक्राउ गरेका व्यक्तिका बारेमा केही खुलाएको छैन
