पूर्वप्रधानमन्त्री डा बाबुराम भट्टराईले ललिता निवास प्रकरणमा आफूले कसैसँग उन्मुक्तिको याचना नगरेको बताएका छन् । उनले हाल केन्द्रीय अनुसन्धान ब्युरो (सीआईबी) ले गरिरहेको छानबिनको क्रममा पनि आफूसँग कसैले कुनै सोधपुछ नगरेको भट्टराईको भनाइ छ । 

तर, आफूलाई यो प्रकरणमा जबरजस्ती मुछ्ने काम भइरहेको भन्दै भट्टराईले गम्भीर ध्यानाकर्षण भएको बताएका छन् । 

‘केही समययता केही दृश्य–अदृश्य वृत्तबाट चर्चित ललितानिवास जग्गा अपचलन प्रकरणमा मलाई जुन ढंगले जवरजस्ती मुछ्ने, अपराधी झैं दुष्प्रचार गर्ने, सम्बन्धित निकायले कुनै सोधपुछ तथा छानबिन नगर्ने र  उल्टै “उन्मुक्ति दिने” नाटकीय प्रचारवाजी भइरहेको छ त्यसप्रति मेरो गम्भीर ध्यानाकर्षण भएको छ’, भट्टराईले शुक्रबार सामाजिक सञ्जालमार्फत भनेका छन् । 

उनले ललितानिवास लगायत सबै ठूला भ्रष्टाचार प्रकरणबारे निष्पक्ष छानवीन होस् र दोषीलाई हदैसम्मको सजाय होस् भन्ने कुरा आफूले निरन्तर उठाउँदै आएको भट्टराईले बताएका छन् ।  

‘मेरो लामो सार्वजनिक जीवनमा आजसम्म कुनै नैतिक दाग लागेको छैन र  कसैले भ्रष्टाचारजन्य आरोप लगाउन सकेको छैन। ललितानिवास प्रकरणमा पनि मेरो कुनै निजी वा पारिवारिक स्वार्थ जोडिएको र गैरकानूनी कार्य भएको कहींकतै कसैले आरोप लगाउन र पुष्टि गर्न सक्दैन’, भट्टराईको भनाइ छ । 

आफ्नो प्रधानमन्त्रीकालमा प्रक्रियागत ढंगले सम्बन्धित मन्त्रालयबाट आएको प्रस्तावमाथि मन्त्रिपरिषद्ले स्वीकृति दिएको भट्टराईको भनाइ छ । यसबारे आफूले यसअघि नै अख्तियारमा बयान दिएको र आफ्नो धारणा त्यही रहेको भट्टराईले बताएका छन् ।