समाजवादी मोर्चाको बैठक आझ (आइतवार) नेकपा (एकीकृत समाजवादी पार्टी)को केन्द्रीय कार्यालयमा बस्ने भएको छ । साँझ बस्ने बैठकमा मोर्चा आबद्ध चार दलका शीर्ष नेताले सरकारका गतिविधि, समसामयिक राजनीतिक घटनाक्रमलगायत विषयमा छलफल गर्ने एकीकृत समाजवादीका महासचिव घनश्याम भुसालले जानकारी दिए ।

मोर्चामा नेकपा (माओवादी केन्द्र), जनता समाजवादी पार्टी, एकीकृत समाजवादी र विप्लव नेतृत्वको नेपाल कम्युनिस्ट पार्टी आबद्ध छन् । मोर्चा गठन भएको करिब दुई महिनापछि बस्न लागेको यो दोस्रो बैठक हो । मोर्चाको नेतृत्व अहिले एकीकृत समाजवादीका अध्यक्ष माधवकुमार नेपालले गरेका छन् ।

मोर्चाको पहिलो बैठक असार २३ गते बसेको थियो । 

यसैबीच एकीकृत समाजवादीको शनिवार बसेको सचिवालय बैठकमा आसन्न पोलिट्ब्युरो बैठकका साथै केन्द्रीय कमिटी बैठकका तयारी तथा एजेण्डा, समाजवादी मोर्चालाई थप सशक्त बनाउने विषयमा छलफल भएको छ ।

गत असार ४ गते राष्ट्रिय सभागृहमा एक कार्यक्रमको आयोजना गरी उनीहरूले मोर्चा घोषणा गरेका थिए ।