कोशी प्रदेशका मुख्यमन्त्री उद्धव थापाले आज विश्वासको मत लिनेगरी संसद् सचिवालयले सूचना प्रकाशन गरेको छ । विश्वासको मत लिन आज दिउँसो १ बजेका लागि प्रदेश सभाको बैठक बोलाइएको छ । 

बैठकको कार्यसूची तय गर्न उपसभामुख सिर्जना दनुवारले कार्यव्यवस्था परामर्श समितिको बैठक बोलाएको संसद् सचिवालयका प्रवक्ता गौतमराज अमात्यले जानकारी दिए । उनका अनुसार कार्यव्यवस्था परामर्श समिति बैठक बिहान ८ बजे बस्ने छ । 

प्रतिपक्षी दल एमाले र राप्रपाले भने थापालाई विश्वासको मत प्राप्त हुन नदिन उपसभामुख दनुवारलाई अनुपस्थित गराउने रणनीतिमा छन् । तर, अहिलेसम्म उनी बिदा बस्नेबारे कुनै जानकारी नआएको प्रवक्ता अमात्यले बताए । 

यसअघि नै एमालेले आफ्ना ज्येष्ठ ७ र राप्रपाले २ जना जेष्ठ सदस्य सांसदहरूलाई बिदामा राखेको छ । राप्रपाका सांसदलाई अध्यक्ष राजेन्द्र लिङदेनले अनुपस्थित हुन निर्देशन दिइसकेका छन् । 

सत्तापक्षमा रहेका ४७ सांसदमध्ये १ सांसदले सभा सञ्चालन गर्नुपरेको अवस्थामा गठबन्धनलाई विश्वासको मत लिन १ सांसद अपुग हुने देखिन्छ  । 

एमालेले आजै उपसभामुखलाई राजीनामा गराउने वा बिरामीको बाहानामा अनुपस्थित गराउन सक्ने अनुमान हुन थालेको छ । 

कोशीमा यसअघि सरकार बनाउन गठबन्धनले सभामुख बाबुराम गौतमलाई राजीनामा गराएको थियो भने प्रदेश सभाका ज्येष्ठ सदस्य कांग्रेस सांसद गयानन्द मण्डललाई बैठकको अध्यक्षता गर्न नदिन राज्यमन्त्रीमा नियुक्त गरेको थियो ।

हाल कोशी प्रदेश सभामा एमालेका ४०, नेपाली कांग्रेसका २९, नेकपा माओवादका १३, राष्ट्रिय प्रजातन्त्र पार्टीका ६, नेकपा एकीकृत समाजवादीको ४ र जसपाको १ जना सांसद छन् ।