०४ साउन २०८३, सोमबार
बौद्ध इन्टरनेसनल स्कूल उपत्यकाव्यापी बास्केटबल प्रतियोगिताको च्याम्पियन बनेको छ। बौद्धले ब्वाइज र गर्ल्स दुवैको उपाधि आफ्नो पोल्टामा पारेको हो।
बौद्धले गोकर्णेश्वरको अत्तरखेलमा भएको फाइनल भिडन्तमा टेरेसा एकेडेमीलाई ब्वाइजतर्फ पाखा लागायो । बौद्धले आरोहण श्रेष्ठको ३१ स्कोरको मद्दतमा टेरेसालाई ६३–४२ अंकले पराजित गर्न सफल भयो ।
यता गर्ल्सतर्फ बौद्धले एनसीसीएसलाई हरायो । उपाधि जित्ने क्रममा बौद्ध ३८–३० अंकले विजयी भयो । उसका लागि सजना खत्रीले १३ अंकको योगदान दिइन् ।
प्रतियोगिताको ब्वाइजमा बौद्धका आरोहण तथा गर्ल्समा बौद्धकै डिकी चेनजोम मोस्ट भ्यालुएबल खेलाडी चुनिए । यस्तै ब्वाइजतर्फ फुर्वा छेतेन र गर्ल्समा एनसीसीएसकी दिभा महर्जन सर्वाधिक अंक बटुल्न सफल भए ।
मनास्लु वर्ल्ड स्कूलले फेयर प्लेको उपाधि पाउन सफल भयो। प्रतियोगितामा ब्वाइजमा २४ तथा गर्ल्समा १६ टिमले भाग लिएका थिए।
