२२ जेठ २०८३, शुक्रबार
काठमाडौं महानगरपालिकाका मेयर बालेन साहको अराजक 'फेसबूक स्टाटस'का कारण चौतर्फी आलोचना भएपछि छोरी जन्मिएको विषय ढिलागरी सार्वजनिक गरेको खुलेको छ ।
आफ्नी श्रीमती सविना काफ्ले चढेको सरकारी गाडीलाई शनिवार ट्राफिक प्रहरीले रोकेर सोधपुछ गरेपछि आक्रोशित बालेनले सिंहदरबारमा आगो लगाउने धम्कीसहित 'फेसबूक स्टाटस' लेखेका थिए ।
सोही विषयको आलोचनाबाट बच्न केही दिनअघि नै जन्मिएकी छोरीको विषय ढिला गरी सार्वजनिक गरेको खुलेको हो ।
बालेनसँग निकट रहेको एक फेसबूक पेजले बिहान ८:०८ मा बालेनकी श्रीमतीले छोरीलाई जन्म दिएको भन्दै विवरण सार्वजनिक गरेको थियो ।
११.२९ मा उक्त पेजले पनि केही दिनअघि नै जन्मिएको भनेर 'स्टाटस' सच्याएको छ ।
तर, मेडिसिटी अस्पताल स्रोतका अनुसार सविनाले केही दिनअघि नै छोरीलाई जन्म दिएकी हुन् । छोरी अस्पतालमै रहे पनि सविना 'डिस्चार्ज' समेत भइसकेको स्रोतको दाबी छ ।
ट्राफिक प्रहरीले रोक्दा गाडीमा ड्राइभर र बालेनकी श्रीमती थिए । चेकजाँचका क्रममा रोकेर सोधपुछ गरेपछि आक्रोशित बालेनले अराजक शैलीमा फेसबूक स्टाटस लेखेका हुन् ।
'आजका लागि केही भएन, भोलिबाट हाम्रो महानगरपालिकाको कुनै पनि गाडी सरकारबाट रोकियो भने सिंहदरबारमा आगो लगाइदिन्छु । याद राख चोर सरकार,' बालेनले फेसबूकमा लेखेका थिए ।
सार्वजनिक बिदाको दिन बालकुमारीबाट कोटेश्वरतर्फ जाँदै गरेको सरकारी नम्बर प्लेटको गाडीलाई शनिवार दिउँसो कोटेश्वरमा ट्राफिक प्रहरीले रोकेर सोधपुछ गरेको थियो ।
सार्वजनिक बिदाको दिन सरकारी गाडी चलाउन पास अनिवार्य छ । बालेनकी श्रीमतीले पासविनै सरकारी गाडी लिएर हिँडेको खुलेको छ।
'उहाँसँग पास थिएन, रोकेर हामीले सोधखोज मात्र गरेका हौं,' प्रहरी स्रोतले लोकान्तरसँग भन्यो, '२/३ मिनेटमै उहाँलाई छाडिदिएका थियौं ।'
