नक्कली शैक्षिक प्रमाणपत्र बनाएको आरोपमा खानेपानी तथा सरसफाई डिभिजन कार्यालय, नेपालगन्जमा कार्यरत अधिकृत हीमकुमारी सुनार पुनविरुद्ध विशेष अदालत काठमाडौंमा मुद्दा दायर भएको छ ।

नक्कली शैक्षिक प्रमाणपत्रको आधारमा नियुक्ति लिई नियम विपरीत सरकारी सेवामा प्रवेश गरेको अभियोगमा उनीविरुद्ध भ्रष्टाचार मुद्दा दायर गरिएको अख्तियार दुरुपयोग अनुसन्धान आयोगका प्रवक्ता भोला दाहालले जानकारी दिए ।

प्रवक्ता दाहालका अनुसार उनले माध्यमिक शिक्षा परिषद् क्षेत्रीय कार्यालय वाराणसी, भारतबाट हाइस्कूल उत्तीर्ण गरेको प्रमाणपत्र बनाएकी थिइन् ।

सोही प्रमाणपत्रका आधारमा उनले राजपत्र अनङ्कित द्वितीय श्रेणीको महिला कार्यकर्ताको पदमा नियुक्ति समेत लिएकी आयोगको दाबी छ ।​

उनीविरुद्ध कैद र जरिवानाको मागदाबीसहित भदौ १५ गते विशेष अदालत, काठमाडौंमा मुद्दा दायर गरिएको आयोगले जनाएको छ ।