नेकपा (एमाले)का सांसद रघुजी पन्तले क्रिकेट खेलाडीको लागि नेपालले आधारभूत आवस्यकता नदिएको गुनासो गरेका छन् । खेलाडीको लागि क्रिकेट मैदान र पारिश्रमिक नदिएर अपेक्षा मात्र राख्ने गरिएको उनले गुनासो गरे ।

सोमवार बसेको प्रतिनिधिसभा बैठकको शून्य समयमा एमाले सांसद पन्तले प्रधानमन्त्रीले संसद्मा प्रतिबद्धता जनाए पनि चितवनको क्रिकेट रंगशाला निर्माणको कामले गति नलिएको बताएका हुन् । 

‘आज क्रिकेट हुँदैछ, भारत र नेपालको बीचमा । तर चितवनमा निर्माण गर्न थालिएको रंगशालाबारे प्रधानमन्त्रीले यही संसद्मा धेरै आश्वासन दिनुभएको थियो । निर्माणको काम अगाडि बढ्न सकेन । खेल मैदान, उनीहरूले पाउनुपर्ने पारिश्रमिक र पुरस्कार  नदिने अनि भारतका विरुद्ध छक्कै–छक्का हान्नुस् भनेर आस गरेर हुन्छ ?’ उनले प्रश्न गरे । 

नेपाल र भारतबीच एसिया कप क्रिकेटअन्तर्गतको  बहुप्रतीक्षित खेल आज दिउँसो ३:१५ बजे श्रीलंकामा हुँदैछ । खेल शुरू हुनुअघि संसद्मा क्रिकेटको प्रसंग उठेको हो ।