१४ असार २०८३, आइतबार
सरकारले ल्याएको शिक्षा विधेयकमाथि गम्भीर आपत्ति जनाउँदै यतिबेला नेपाल शिक्षक महासंघ राजधानीकेन्द्रित आन्दोलनमा छ । महासंघको आह्वानमा सरकारी शिक्षकहरूले बिहीवार दोस्रो दिन पनि काठमाडौंमा प्रदर्शन गरेका छन् ।
बिहीवार मध्यान्ह माइतीघर मण्डलामा भेला भएर शिक्षकहरूले नयाँ बानेश्वरसम्म र्याली निकालेका हुन् । सो क्रममा सडक किनारामा रोपिएका रुख, फूलका बोट र दुबोको बेहाल भएको छ । कतिपय ठाउँमा रुखका हाँगा भाँचिएका छन् भने फूल र दुबो सखाप भएको छ ।
यसलाई लिएर काठमाडौं महानरपालिकाका प्रमुख (मेयर) बालेन शाहले महाकवि लक्ष्मीप्रसाद देवकोटाको कविता ‘नटिप्नु हेर कोपिला’को केही अंश सामाजिक सञ्जालमा राखेर व्यंग्य गरेका छन् ।
‘नटिप्नु हेर कोपिला, नचुड्नु पाप लाग्दछ, नच्यात्नु फूल नानी हो, दया र धर्म भाग्दछ,’ तस्वीर शेयर गर्दै उनले लेखेका छन् ।
शिक्षकले पढाइ नै ठप्प गरेर आन्दोलन गरेको भन्दै यसअघि मेयर बालेनले काठमाडौं महानगर क्षेत्रभित्रका शिक्षकलाई कारबाही गर्ने भन्दै बुधवार विज्ञप्ति नै निकालेका थिए ।
